कोठाबाटै जिल्ला निगरानी

इलाम । जिल्ला प्रहरी कार्यालय इलामले कार्यालयको एउटा कोठाबाटै जिल्लाको निगरानी गर्न थालेको छ ।

जिल्लामा अपराध, दुर्घटना र चोरीका घटना बढ्न थालेपछि जिल्लाका सबै बजारमा सीसी क्यामेरा जोडेर निगरानी थालेको हो ।

प्रदेश सरकारको २७ लाख बजेटमा इलाम जिल्लामा ३४ वटा क्यामेरा जडान गरेर निगरानी थालेको कार्यलयको भनाइ छ । इलाम बजारमा १० वटा, फिक्कलमा ८ वटा, पशुपतिनगरमा ८ वटा र मंगलबारेमा ८ वटा क्यामेर जडान गरी निगरानी गर्न थालेको जिल्ला प्रहरी कार्यालय इलामका प्रहरी उपरीक्षक हिराबहादुर पाण्डेले बताउनुभएको छ ।

बजार क्षेत्रमा बढी अपराध, दुर्घटना र बजारमा सामान हराउने उजुरी बढेसँगै प्रहरीले निगरानी बढाएको हो । बजार क्षेत्रमा १० किलोमिटर अप्टिकल फाइबरमार्फत क्यामेरा प्रयोग गरिएको छ । क्यामेरामा एक महिनासम्मको रेकर्ड रहने गरी मिलाइएको छ । क्यामेरा जडानपछि कार्यालयले चोरी भएका २ वटा मोटरसाइकल पत्ता लगाइसकेको छ । क्यामेराको निगरानीले सडकमा हुने दुर्घटनाको पनि नियन्त्रण हुने प्रहरी कार्यालयको भनाइ छ ।

जिल्लाका अन्य ठाउँमा पनि क्यामेरा जडान गर्ने तयारी रहेको जनाइएकाे छ । यसअघि झापा र इलामको सीमानामा मात्र सीसी क्यामेराबाट निगरानी भइरहेको थियो।