१५ महिनाअघि डोटीका बेपत्ता पत्रकारको अस्थिपञ्जर फेला
काठमाडौँ । नेपाल पत्रकार महासंघले महासंघका डोटी शाखा सदस्य तेजबहादुर खड्का बेपत्ता भएको १५ महिनापछि अस्थिपञ्जर फेला परेको घटनालाई गम्भीरतापूर्वक लिँदै अनुसन्धानको माग गरेको छ ।
महासंघका महासचिव रमेश विष्टले बुधबार विज्ञप्ति जारी गर्दै महासंघका बाजुरा शाखा सदस्य एवं रेडियो बुढीनन्दामा कार्यरत पत्रकार खड्काको परिचयपत्र, लाइसेन्स, कपडा, झोला लगायतका सामान भेटिएको र अस्थिपञ्जर फेला परेको घटनामा ध्यानाकर्षण भएको जनाएका छन् ।
यसको सत्यतथ्य छानबिन र भेटिएका हड्डीसहितका सामग्रीको वैज्ञानिक परीक्षण गर्न महासंघले सरकारसँग माग गरेको छ । ‘उक्त रहस्यमय घटनाका सम्बन्धमा गहिरो अनुसन्धान गरी सत्यतथ्य पत्ता लगाउन महासंघ राज्यका सम्बन्धित निकायसँग आग्रह गर्दछ,’ विज्ञप्तिमा भनिएको छ ।
