सरकारलाई दिएको समर्थन फिर्ता गर्ने माआवादी केन्द्रको तयारी
काठमाडौं-नेकपा माओवादी केन्द्रले सरकारलाइ दिएको समर्थन फिर्ता गर्ने तयारी गरेको छ । सर्वोच्च अदालतले पार्टी अलग गरिदिएपछि दुइ पार्टीबीचको दुरी झन् बढेको छ । माओवादी केन्द्र सकेसम्म आफ्नै नेतृत्वमा सरकार बनाउने रणनितिमा लागेको भएपनि सहमति नजुटेपछि अब सरकारलाइ दिएको समर्थन फिर्ता लिने तयारीमा माओवादी केन्द्र लागेको हो ।
अध्यक्ष पुष्पकमल दाहाल प्रचण्डले एकदुई दिनमै सरकारलाई दिएको समर्थन फिर्ता लिने बताउनुभएको छ ।संसद विघटनलाई असंवैधानिक भनेर सडकमा गएका दलहरुबाटै हतारमा समर्थन फिर्ता नलिन आफूमाथि जबरजस्त दबाव रहेको उहाँले बताउनुभयो ।
माओवादी केन्द्रका नेता दिनानाथ शर्माले पनि सीआईएनसँग कुरा गर्दै केही दिन भित्रै सरकारलाइ दिएको समथर्न फिर्ता लिने बताउनुभयो । संघमा सरकारलाई दिएको समर्थन फिर्ता लिंदा त्यसको असर प्रदेश सरकारमा समेत देखिने तर आफुहरु प्रदेश सरकार छाड्नु परे पनि तयार रहेको शर्माको भनाई छ ।
प्रश्न सरकारको होईन, लोकतन्त्र र संविधानको रक्षाको हो, शर्माले भन्नुभयो ‘हामी प्रदेश सरकारबाट बाहिरिन तयार छौं ।’ कर्णाली र सुदुरपश्चिम प्रदेशमा माओबादी केन्द्र नेतृत्वको सरकार छ ।
