प्रिमियर लिग फुटबलमा म्यानचेस्टर सिटीको सानदार जित
एजेन्सी –उपाधि जितिसकेको म्यानचेस्टर सिटीले इङ्ग्लिस प्रिमियर लिग फुटबलको अन्तिम खेलमा सानदार जित निकालेको छ ।
गएराति भएको खेलमा सिटीले एभर्टनलाई ५-० गोल अन्तरले पराजित गरेको हो । घरेलु मैदानमा सिटीलाई जित दिलाउन सर्जियो अग्युरोले दुई गोल गरे । यस्तै केभिन डी ब्रुएन, ग्राबियल जिसस र फिल फोडेनले एक/एक गोल गरे । सिटीले उपाधि जित्ने क्रममा ३८ खेलमा ८६ अङ्क जोडेको छ ।
दोस्रो स्थानमा रहेको म्यानचेस्टर युनाइटेडको ३८ खेलबाट ७४ अङ्क छ । एभर्टन भने ५९ अङ्क जोडेर दशौं स्थानमा झरेको छ । जितपछि म्यानचेस्टर सिटीले उपाधिको ट्रफी समेत उचालेको छ ।
अन्ततः यो सिजनको प्रिमियर लिग समापन भएको छ । गएराति एकैपटक १० खेलहरु सम्पन्न भए । शीर्ष ४ का लागि टिमहरुबीच निकै प्रतिस्पर्धा चल्यो ।
यस्तै ३ खेल बाँकी छँदै उपाधि जितेको म्यान्चेस्टर सिटीको मैदानमा सर्जियो अगुइरोको विदाईले केही भावुक पनि बनायो । सिटीका सर्वाधिक उच्च गोलकर्ता अगुइरोले एभर्टनसँग खेल्दा अन्तिम खेलमा २ गोल समेत गरे ।
लेस्टर सिटी टोटेनहमसँग पराजित हुन पुगेसँगै शीर्ष ४ मा पुग्न असफल रह्यो । यद्यपि चेल्सीले भने एष्टन भिल्लासँग पराजित भएपनि शीर्ष ४ मा रहँदै च्याम्पियन्स लिग खेल्नेछ । म्यान्चेस्टर सिटीसँगै म्यान्चेस्टर युनाइटेड, लिभरपुल र चेल्सी शीर्ष ४ मा रहे ।
यता फुलह्याम, वेष्टवर्म र शेफिल्ड युनाइटेड रेलिगेसनमा परेका छन् । टोटेनहमका स्ट्राइकर ह्यारी केनले यस सिजनमा २३ गोल गर्दै गोल्डेन बुट जितेका छन् । उनले पछिल्ला ७ वर्षको अवधिमा ५ पटकसम्म २० गोलभन्दा माथि गोल गरेका छन् ।
