स्थानीय तह निर्वाचनबारे सरकारको निर्णय संविधानसम्मत छ : महामन्त्री थापा

काठमाडौं-नेपाली कांग्रेसका महामन्त्री गगन थापाले वैशाख ३० मा स्थानीय तह निर्वाचन गर्ने सरकारको निर्णय संविधानसम्मत रहेको बताउनु भएको छ ।

थापाले मंगलवार बिहान सामाजिक सञ्जाल ट्विटरमा सरकारले तोकेको स्थानीय तहको निर्वाचनको मिति संविधानको मर्मअनुरूप भएको उल्लेख गर्नु भएको छ ।

‘वैशाख ३० गते स्थानीय तहको निर्वाचन गर्ने सरकारको निर्णय उपयुक्त छ,’ उहाँले लेख्नु भएको छ ‘संविधानको मर्म अनुरूप छ।’महामन्त्री थापाले निर्वाचनको मिति तोकिएसँगै निर्वाचन टार्ने गरी भएका बहससमेत सकिएको बताउनु भएको छ । साथै उहाँले संविधान र लोकतन्त्रको मर्मविपरीत हिँड्ने छुट कसैलाई नभएको समेत सचेत गराउनु भएको छ ।

‘स्थानीय तह रिक्त हुन्छ कि भन्ने आशंका हटेको छ‚’ उहाँले उल्लेख गर्नु भएको छ । अनि निर्वाचन टार्ने गरी भएका अनेकन बहस अब सकिएका छन्। सबैले सदैव हेक्का राख्नु पर्दछ(संविधान र लोकतन्त्रको मर्म विपरीत हिँड्ने छुट कसैलाई छैन।’