१५ लाख १२ हजार हेक्टर जमिनमा सिँचाइ सुविधा पुग्यो
काठमाडौं-२०७८ फागुनसम्म १५ लाख १२ हजार ४ सय ३२ हेक्टर जमिनमा सिँचाइ सुविधा पुगेको छ।अर्थ मन्त्रालयका अनुसार आर्थिक वर्ष २०७८/७९ को फागुनसम्म संघ अन्तर्गत सञ्चालित कार्यक्रमबाट सतह सिँचाइ २,८९५ हेक्टर तथा भूमिगत सिँचाइ ११० हेक्टर गरी कुल ३,००५ हेक्टर सिञ्चित क्षेत्र थप भएको हो । २०७८ असारसम्म कुल १५ लाख ९ हजार ४ सय २७ हेक्टर जमिनमा सिँचाइ सुविधा पुगेको थियो।
जलउत्पन्न प्रकोप नियन्त्रणको लागि आर्थिक वर्ष २०७७/७८ मा ७७ कि.मि. तटबन्ध निर्माण भई ८५३ हेक्टर जग्गा उकास गरिएको थियो भने आर्थिक वर्ष २०७८/७९ को प्रथम आठ महिना सम्ममा ३१.६७ कि.मि. तटबन्ध निर्माण तथा ५३ हेक्टर जग्गा उकास भएको छ। हालसम्म कुल १,२४१ कि.मि. तटबन्ध निर्माण र १२ हजार ५८ हेक्टर जग्गा उकास गरिएको छ।
कृषियोग्य जमिनमा सिँचाइ सुविधाको विस्तारबाट कृषि उत्पादनमा वृद्धि ल्याउन हाल संघ अन्तर्गत १६ वटा सिँचाइ आयोजना सञ्चालनमा छन्।
