बिगुल सहकारीको १३औं साधारणसभा सम्पन्न, नवनिर्मित भवन उद्घाटन
सनिउल्ला धोबी,
कपिलवस्तु, शिवराज नगरपालिका–३ मदवामा रहेको बिगुल बचत तथा ऋण सहकारी संस्था लिमिटेडको १३औं वार्षिक साधारणसभा सफलतापूर्वक सम्पन्न भएको छ ।
साधारणसभाको अवसरमा संस्थाको नवनिर्मित कार्यालय भवनको पनि उद्घाटन गरिएको छ ।
उद्घाटन कार्यक्रमका प्रमुख अतिथि तथा शिवराज नगरपालिका वडा नं ३ का वडा अध्यक्ष टेकलाल सापकोटाले रिबन काटेर भवनको समुद्घाटन गर्नुभयो ।
कार्यक्रममा सम्बोधन गर्दै सापकोटाले सहकारी संस्थाहरूले आर्थिक विकाससँगै सामाजिक क्रियाकलापमा पनि सक्रिय हुनुपर्ने धारणा व्यक्त गर्नुभयो ।
नेकपा एमाले शिवराज नगर अध्यक्ष, चेम्बर अफ कमर्सका केन्द्रीय सदस्य तथा कपिलवस्तु जिल्ला अध्यक्ष महादेव पोखरेलले सहकारी संस्थाहरूले समय अनुसारको परिवर्तन र उत्पादनमूलक कार्यहरूमा ध्यान दिनुपर्ने बताउनुभयो ।
पोख्रेलले सहकारीको दिगो प्रगतिका लागि योजनाबद्ध ढंगले अघि बढ्नुपर्नेमा जोड दिनुभयो । 
बिगुल बचत तथा ऋण सहकारीका अध्यक्ष नरबहादुर पौडेलले छोटो समयमा संस्थाले प्रगति गरेको उल्लेख गर्दै, सबैको सकारात्मक सहयोगले संस्था अझ सशक्त बन्दै गएको बताउनुभयो ।
कार्यक्रमका अर्का अतिथि अरनिको सहकारीका अध्यक्ष द्रोण अधिकारीले सहकारीहरू नियमअनुसार चल्नुपर्नेमा जोड दिनुभयो ।
कार्यक्रममा विभिन्न संघ-संस्थाका प्रमुख तथा प्रतिनिधिहरूको उपस्थिति रहेको थियो । कार्यक्रमको सञ्चालन संस्थाका सचिव बेलसिंह रावतले गर्नुभएको थियो ।
साधारणसभाले सहकारीको आगामी योजनाहरू प्रस्तुत गर्दै आर्थिक विकासमा थप योगदान पुर्याउने प्रतिबद्धता व्यक्त गरेको छ ।
