नेपालले आज थाइल्याण्डसँग मैत्रीपूर्ण खेल खेल्दै

काठमाडौं –

एएफसी महिला एसियन कप–२०२६ छनोटको तयारीमा रहेको नेपाली राष्ट्रिय महिला फुटबल टोलीले आज थाइल्यान्डसँग अन्तर्राष्ट्रिय मैत्रीपूर्ण खेल खेल्न लागेको हो। खेल थाइल्यान्डको पथुम थानीस्थित थम्मासत स्टेडियममा नेपाली समयअनुसार साँझ पौने ५ बजे सुरू हुनेछ।

थाईल्यान्ड भ्रमणमा रहेको नेपाली टोलीले गत शुक्रबार थाइल्यान्डसँग बन्द रंगशालामा अभ्यास खेल खेलेको थियो।  सो खेलमा नेपाल १–० ले पराजित भएको थियो। नेपाल आज पुनरागमन जितको खोजीमा हुने छ।

फिफा महिला विश्वकप खेलिसकेको थाइल्यान्डसँग नेपालले पहिलोपटक मैत्रीपूर्ण खेल खेल्न लागेको हो।  यद्यपि, महिला एसियन कपमा भने नेपालले सन् १९९६ र १९९९ मा थाईल्यान्डसँग दुई खेल खेलेको छ। दुबै खेलमा नेपाल ५–० गोलले पराजित भएको थियो। हाल फिफा वरियतामा थाइल्यान्ड ४७औं र नेपाल ९९औं स्थानमा छन्।

नेपाली टोलीले यही जुन २९ बाट उज्बेकिस्तानमा सुरू हुने महिला एसियन कप छनोटमा भाग लिनेछ।  नेपाल समूह एफमा रहेको छ। यस समूहमा उज्बेकिस्तान, लाओस र श्रीलंका छन्।छनोट चरणमा ३४ टिमलाई ८ समूहमा बाँडिएको छ। प्रत्येक समूह विजेताहरूले सन् २०२६ को मार्चमा अष्ट्रेलियामा हुने महिला एसियन कपमा स्थान बनाउनेछन् समूह एफका सबै खेल उज्बेकिस्तानमा हुनेछन्।