निर्वाचन प्रहरीमा भर्ना हुन दुई दिनमै २७ हजारको आवेदन

आगामी २१ फागुनमा हुने निर्वाचनको सुरक्षार्थ निर्वाचन प्रहरीका लागि आवेदन दिने युवाहरूको संख्या दुई दिनमै २७ हजार नाघेको छ । यो संख्या नेपाल प्रहरीमातहत भर्ना हुन चाहने युवाहरूको मात्रै हो । सरकारले एक लाख ३३ हजार ९८० निर्वाचन प्रहरी भर्ना गर्न लागेको हो । जसका लागि २४ पुसबाट ७७ वटै जिल्ला प्रहरी कार्यालयबाट आवेदन खुला गरेको छ । इच्छुक युवाले आगामी १ माघसम्म आवेदन दिन सक्नेछन् । देशभरका जिप्रकामा पहिलो दिन नै ११ हजार ६९ र दोस्रो दिन १६ हजार ३६२ को आवेदन परेको छ ।

दुई दिनमै २७ हजार ४३१ युवाले निर्वाचन प्रहरीमा भर्ती हुन आवेदन दिएको नेपाल प्रहरीका केन्द्रीय प्रवक्ता डिआइजी अविनारायण काफ्लेले बताए । ‘निर्वाचन प्रहरीको आवेदन २४ पुसदेखि खुला भएको छ । इच्छुक युवाले १ माघसम्म आवेदन दिन सक्नेछन् । पहिलो दिनमा नेपाल प्रहरीमा मात्रै ११ हजार ६९ युवाको आवेदन पर्‍यो । दोस्रो दिन यो संख्या बढेर १६ हजार ३६२ पुगेको छ । आवेदनको चाप हेर्दा युवाको सहभागिता उत्साहजनक ढंगले बढेको देखिन्छ,’ उनले भने ।

निर्वाचन प्रहरीमा आवेदन दिने महिलाहरूको संख्या पनि उत्साहजनक देखिन्छ । शुक्रबार आवेदनको परेको संख्या विश्लेषण गर्दा आवेदन दिनेमध्ये २७.८६ प्रतिशत महिला देखिन्छ । त्यस दिन मुलुकभर चार हजार ५६० महिलाको आवेदन परेको थियो भने पुरुषको संख्या ११ हजार ८०२ छ ।

यता सशस्त्र प्रहरीमा पनि आवेदन दिने युवाको लर्को देखिन्छ । सशस्त्रले उपलब्ध गराएको तथ्यांकअनुसार शुक्रबार ७७ वटै गुल्ममा ७३३ युवाको आवेदन परेको छ । सशस्त्रलाई १५ हजार ११० मात्रै निर्वाचन प्रहरी भर्ना गर्ने स्वीकृति छ । आवेदन दिनेमध्ये १४२ महिला र ५९१ पुरुष छन् ।

सशस्त्र प्रहरीका केन्द्रीय प्रवक्ता डिआइजी मनीष थापाले निर्वाचन प्रहरीमा भर्ती हुन चाहने युवाको संख्या सशस्त्रमा पनि उत्साहजनक रहेको बताए । ‘सशस्त्रले १५ हजार ११० निर्वाचन प्रहरी मात्रै भर्ना गर्न पाउँछ । हालसम्मको स्थिति हेर्दा युवाको सहभागिता उत्साहजक देखिन्छ । हामीले ७७ वटै जिल्लाबाट भर्नाका लागि आह्वान गरेका छौँ । आवेदन पर्ने क्रम जारी छ,’ उनले भने ।

निर्वाचनका लागि हालसम्म मुलुकभर १० हजार ९६७ निर्वाचनस्थल निर्धारण भएका छन् । जसमा निर्वाचन केन्द्र २३ हजार ११२ निर्धारण भएका छन् । गृह मन्त्रालयका अनुसार ३६ सय ८० मतदानस्थल अतिसंवेदनशील छन् । ती अधिकांश तराईका जिल्लाका छन् । त्यस्तै, ४४ सय ४२ मतदानस्थल सुरक्षा चुनौती विश्लेषणका आधारमा संवेदनशील सूचीमा राखिएका छन् । बाँकी २८ सय ४५ मतदानस्थल भने सामान्य अवस्थाका छन् ।

प्रहरीका अनुसार निर्वाचन प्रहरीले न्यूनतम ५४ हजारदेखि अधिकतम ८३ हजार रुपैयाँसम्मको खर्च सिलिङभित्र ४० दिनको तलबसहित पोसाक, खाद्यान्न र भ्रमण भत्ताबापतको रकम प्राप्त गर्नेछन् । निर्वाचन प्रहरीको दर्जा जवानसरहको हुन्छ । निर्वाचन प्रयोजनार्थ उनीहरू ४० दिन फिल्डमा खटिनेछन् र त्यसै अवधिको तलब–सुविधा प्राप्त गर्नेछन् ।

प्रहरीका अनुसार काठमाडौं उपत्यकाभित्र खटिने निर्वाचन प्रहरीले सबैभन्दा कम र जुम्लामा खटिने निर्वाचन प्रहरीले सबैभन्दा धेरै सुविधा प्राप्त गर्नेछन् । काठमाडौं उपत्यकाभित्र खटिनेले तलब र अन्य सुविधासहित ५४ हजार ३६८ रुपैयाँ मात्रै प्राप्त गर्नेछन् । जुम्लामा खटिनेले भने ८३ हजार २४१ रुपैयाँ पाउनेछन् ।
त्यस्तै, तराईका जिल्लामा खटिनेका लागि तलब–सुविधासहित ५५ हजार ६६६ खर्च हुनेछ । तराईको पनि झापामा खटिनेले भने काठमाडौंसरह ५४ हजार ३६८ मात्रै पाउँछन् ।

पहाडी क्षेत्रका जिल्लामा खटिनेहरूका लागि तलब र अन्य सुविधासहित ५८ हजार ७८५ रुपैयाँ खर्च गरिनेछ । तर, पहाडी जिल्लाका पनि सहरी क्षेत्रमा खटिनेहरूले ५६ हजार ९७१ रुपैयाँबराबरको मात्रै तलब–सुविधा प्राप्त गर्नेछन् ।

हिमाली क्षेत्रका जिल्लामा खटिने निर्वाचन प्रहरीका लागि भने तलब र अन्य सुविधासहित ६४ हजार ६०८ रुपैयाँ खर्च गरिनेछ । तर, उक्त क्षेत्रको पनि विकट क्षेत्रमा खटिनेहरूलाई तलब र अन्य सुविधासहित ८३ हजार २४१ रुपैयाँ खर्च गरिने प्रहरीले जनाएको छ ।

नेपाल प्रहरीका अनुसार मतदान केन्द्र र सुरक्षा थ्रेट वृद्धिसँगै निर्वाचन प्रहरीको संख्या पनि बढेको छ  । ०७९ को निर्वाचनमा मुलुकभर १० हजार ७५६ मतदानस्थल र २१ हजार ५१२ मतदान केन्द्र निर्धारण भएका थिए ।