पाल्पाको भगवती रथ जात्रामा लुम्बिनीका मुख्यमन्त्री आचार्य

लुम्बिनी प्रदेशका मुख्यमन्त्री चेतनारायण आचार्यले पाल्पामा मनाइने ऐतिहासिक तथा प्रसिद्ध रणउजीरेश्वरी भगवती रथ जात्राको अवलोकन गरेका छन् । शनिबार पाल्पा पुग्नुभएका मुख्यमन्त्री आचार्यले भगवती मन्दिर परिसरमा पुगेर रथ जात्रा तथा जात्रामा सहभागी श्रद्धालुहरूको उपस्थिति अवलोकन गरेका हुन ।

मुख्यमन्त्री आचार्यले जात्राको शनिबारनै एक शुभकामना सन्देश जारीगर्दै रणउजीरेश्वरी भगवती रथ जात्राले नेपालको राष्ट्रिय स्वाभिमान, वीरता, धार्मिक आस्था र सांस्कृतिक पहिचानलाई पुस्तौँदेखि जीवन्त राख्दै आएको बताउनुभएको थियो ।

नेपाल र इस्ट इन्डिया कम्पनीबीच वि.सं. १८७१-७२ मा भएको युद्धमा नेपाली सेनाले हासिल गरेको ऐतिहासिक विजयको स्मरणमा प्रत्येक वर्ष भाद्र कृष्ण नवमीका दिन भगवती रथ जात्रा मनाउने गरिन्छ । कर्णेल उजिरसिंह थापाको नेतृत्वमा प्राप्त विजयको स्मरणमा महिषासुरमर्दिनी भगवतीको मन्दिर निर्माण गरी रथ निकाल्ने परम्परा सुरु भएको इतिहास छ ।