मनाइयो मोहम्मद जयन्ती (मोहम्मद डे)
न्युज सेन्टर नेपाल – मोहम्मद जयन्ती (मोहम्मद दिवस) को अवसरमा आज कपिलवस्तुको विभिन्न स्थानमा नेपाली मुस्लिम समुदायले बृहत र्यालीको आयोजना गरेको छन ।
इस्लाम धर्मका संस्थापक पैगम्बर मोहम्मदको सम्झनामा निकालिएको यस र्यालीमा मुस्लिम धर्मावलम्बीहरूको ठूलो सहभागिता देखिएको थियो ।
र्याली कपिलवस्तुको विभिन्न बजार चोकबाट सुरु भएर नगरको विभिन्न भाग हुँदै सभामा परिणत भएको थियो ।
सहभागीहरूले इस्लामिक मूल्य, एकता, र मानवताको सन्देश फैलाउने नाराहरू लगाएका थिए । र्यालीमा सहभागीहरूले मोहम्मद साहेबको शिक्षालाई आत्मसात गर्दै शान्ति, सद्भाव, र आपसी भाइचारा सुदृढ पार्न आह्वान गरेका थिए ।
र्यालीलाई सम्बोधन गर्दै मुस्लिम अगुवा जमशेर अली मियाले पैगम्बर मोहम्मदको शिक्षा र मार्गदर्शनले समाजलाई नैतिकता, परोपकार, र मानवता तर्फ प्रेरित गर्ने बताउनु भयो ।
उहाँले भन्नुभयो, “पैगम्बर मोहम्मदको शिक्षा केवल मुस्लिम समुदायका लागि मात्र नभई सम्पूर्ण मानव समाजको उन्नतिको मार्गदर्शक हो । आजको यो र्यालीले हामीलाई धार्मिक सहिष्णुता र भाइचारा सुदृढ गर्न सन्देश दिन्छ।”
जमशेर अलीले मोहम्मद साहेबको शिक्षाले शान्ति र भाइचाराको महत्त्वलाई उजागर गर्दै, अहिलेको सामाजिक सन्दर्भमा सबै समुदायबीच आपसी समझदारी र सहकार्यको आवश्यकता रहेको पनि जोड दिनुभयो ।
उहाँले इस्लाम धर्मको सन्देशले विश्वभर नै शान्ति र समृद्धि ल्याउने बताउँदै, यस्ता धार्मिक पर्वहरूले मानिसहरूबीचको प्रेम र सद्भावलाई अझ बलियो बनाउने उल्लेख गर्नुभयो ।
युवा नेता रहिस शाहले पनि यस अवसरमा बोल्दै मोहम्मद जयन्तीलाई धर्म, संस्कृति, र सहिष्णुताको उत्कृष्ट उदाहरणको रूपमा वर्णन गर्नुभयो ।
उहाँले भन्नुभयो, “यो पर्वले मुस्लिम समुदायमा मात्र नभई सबै धर्मका मानिसहरूबीच सद्भाव, शान्ति, र आपसी सहिष्णुताको सन्देश प्रवाहित गरेको छ । हामीले यो पर्वलाई धार्मिक सहिष्णुता र सद्भावले मनाएका छौँ, जसले हाम्रा विविधतामा एकता ल्याउँछ।”
रहिस शाहले सामाजिक एकता र समझदारीको महत्त्वमा जोड दिँदै, यस्ता अवसरहरूले समुदायहरूबीचको दूरीलाई घटाउँदै भाइचारा र परस्पर विश्वासलाई मजबुत बनाउने कुरा बताउनु भयो ।
यसै अवसरमा, नेपाल सरकारले मुस्लिम समुदायको यस धार्मिक पर्वको सम्मानस्वरूप आज सार्वजनिक बिदा दिएको छ । देशभरका नेपाली मुस्लिम समुदायले यस दिनलाई विशेष रूपमा मनाउँदै धार्मिक तथा सांस्कृतिक कार्यक्रमहरूको आयोजना गरिरहेका छन्।
https://www.facebook.com/share/v/ZvFaXLqyJSJboKZV/?mibextid=oFDknk
