मनकामना सामुदायिक वनको १२औँ साधारण सभा सम्पन्न
न्युजसेन्टर नेपाल–
कपिलवस्तुको शिवराज नगरपालिका–१ करहियामा अवस्थित मनकामना सामुदायिक वन उपभोक्ता समूहको १२औँ वार्षिक साधारण सभा आइतबार सम्पन्न भएको छ । सामुदायिक वनको संरक्षण, व्यवस्थापन र दिगो उपयोगका विषयमा छलफल गर्दै सभा सम्पन्न गरिएको हो ।
साधारण सभाका प्रमुख अतिथि डिभिजन वन कार्यालय गौतम बुद्धका डिभिजनल वन प्रमुख महेन्द्रराज वाग्लेले सामुदायिक वन स्थानीय समुदायको साझा सम्पत्ति भएकाले यसको संरक्षणमा सबै उपभोक्ताको सक्रिय सहभागिता अनिवार्य रहेको बताउनुभयो । ।
उहाँले वनसँग प्रत्यक्ष रूपमा आश्रित नागरिकहरूले वन विनाश रोक्न, अवैध कटानी नियन्त्रण गर्न र जैविक विविधता संरक्षणमा अग्रसर हुनुपर्नेमा जोड दिनुभयो । सामुदायिक वनले वातावरण संरक्षणसँगै स्थानीयको जीविकोपार्जनमा पनि महत्वपूर्ण भूमिका खेल्दै आएको उहाँको भनाइ थियो ।
कार्यक्रममा मनकामना सामुदायिक वनका अध्यक्ष विनोद कुवरले संस्थाको वार्षिक कार्यप्रगति प्रतिवेदन तथा आगामी कार्ययोजना प्रस्तुत गर्नुभएको थियो । उहाँले गत आर्थिक वर्षमा वन संरक्षण, वृक्षरोपण, आगलागी नियन्त्रण, वन पैदावार व्यवस्थापनलगायत क्षेत्रमा गरिएका गतिविधि र देखिएका समस्याहरू नागरिक समस्या प्रतिवेदनमार्फत साधारण सभामा प्रस्तुत गरिएको जानकारी दिनुभयो ।
त्यसैगरी कोषाध्यक्ष सरोज शर्माले आर्थिक प्रतिवेदन प्रस्तुत गर्दै संस्थाको आय–व्यय विवरण सार्वजनिक गर्नुभयो । उहाँले आगामी आर्थिक वर्षमा वन व्यवस्थापन, उपभोक्ता हितका कार्यक्रम तथा वातावरण संरक्षणसम्बन्धी योजनाहरू कार्यान्वयन गरिने बताउनुभयो ।
साधारण सभामा शिवराज नगरपालिका–१ का वडा अध्यक्ष खिमबिक्रम केसी, शिवपुर सब–डिभिजन वन कार्यालय शिवपुरका कार्यालय प्रमुख ओली महमद राइनलगायतको विशेष आतिथ्यता रहेको थियो । साथै विभिन्न सामुदायिक वन उपभोक्ता समूहका अध्यक्ष तथा प्रतिनिधिहरूको उल्लेखनीय सहभागिता रहेको थियो ।
