ठुलाे दुर्घटनाबाट बच्यो बुद्ध एयरको जहाज
काठमाडौं – सोमबार बिहान ८ बजेर ३२ मिनेटमा बुद्ध एयरको विमान नियमित उडान भर्न काठमाडौंबाट विराटनगरका लागि उड्यो । विमानमा ४ जना क्रु मेम्बर र ७३ जना सवार थिए ।
विमान ३० मिनेटमा विराटनगर विमानस्थल पुगेपनि विमानका क्याप्टेन आङ्गेलो शेर्पाले विमानको लयान्डिङ गेयरमा समस्या भएको थाहा पाएपछि जहाज अवतरण नगरी काठमाडौंतर्फ फर्काए । काठमाडौंमा आएपछि पनि विमान करिब ३० मिनेट आकाशमा होल्ड भयो ।
काठमाडौंको आकशमा १० फन्को लगाएको विमानको फोर्स ल्यान्डिङ गराउने तयारी भइरहँदा विमानको ल्यान्डिङ गेयरले काम गर्यो र जोखिमका बीच क्याप्टेन शेर्पाले विमानको सफल अवतरण गराए । विमानको ल्यान्डिङ गेयरमा समस्या भएको खबरपछि विमान भित्र यात्रुहरुको रुवाबासी मच्चिएको थियो ।
यात्रुहरुका अनुसार काठमाडौं आउँदासम्म खासै डर लागेको थिएन । तर काठमाडौंमा पनि ल्याण्ड हुन नसकेपछि जहाजभित्र रुवाबासी चलेको उनीहरूले सुनाए । यता सोमबार नै बुद्ध एयरको अर्को विमानमा पनि समस्या देखियो ।
काठमाडौंबाट पोखराका लागि उडेको विमानको ककपीटमा धुवाँ देखिएपछि काठमाडौं फर्किएको थियो । एकैदिन दुईवटा विमानमा समस्या देखिएपनि भाग्यवस दुइवटै विमान काठमाडौंको त्रिभुवन अन्तर्राष्ट्रिय विमानस्थलमा सकुशल अवतरण गरे र ठुलो दुर्घटनाबाट बचे ।a
