कपिलवस्तुमा निशुल्क दाउरा वितरण
सनिउल्ला धोबी,कपिलवस्तु –कपिलवस्तुमा शीतलहर शुरु भएसँगै चिसो बढेको कारण सर्वसाधरणको जनजीवन प्रभावित हुन थालेपछि निशुल्क दाउरा वितरण गरीएको छ । जिल्लाको कपिलवस्तु साझेदारी वन व्यवस्थापन समितिले आगो ताप्नका लागि स्थानीयवासीलाई दाउरा वितरण शुरु गरेको समितिका अध्यक्ष गंगेश नाथ तिवारीले बताउनुभयो । जिल्लाका विभिन्न पालिका, वडा कार्यालय, स्वास्थ्य कार्यालय लगायतका करिब तिन दर्जन स्थानमा दाउरा वितरण गरिएको छ । प्रत्येक स्थानमा २ क्विन्टल भन्दा बढी दाउरा वितरण गर्न कार्य भइरहेको अध्यक्ष तिवारीले बताउनु भयो ।
शीतलहर बढेर चिसोको प्रभाव बढेपछि कपिलवस्तु साझेदारी वन व्यवस्थापन समितिले कपिलवस्तुको महाराजगंज बजार, गैडहवा चोक, चन्द्रौटाको समिति चोक, खरेन्द्रपुर, थुन्ह्यिा, मानपुर, चनई बडेगाव सहितका स्थानमा दाउरा वितरण गरीएको छ ।
वृद्धवृद्धा तथा ज्येष्ठ नागरिक र साना बालबालिका लागि आगो ताप्न दाउरा वितरण गरेको छ । बुधबार र बिहीबार विभिन्न चौकमा दाउरा बालेर ताप्नका लागि निशुल्क वितरण गरिएको कपिलवस्तु साझेदारी वन व्यवस्थापन समिति सहायक वन अधिकृत एजाज अन्सारीले बताउनुभयो ।
यस्तै गरिब बस्तीमा समेत आगो ताप्न दाउराको व्यवस्था गर्न लागिएको उहाँले जानकारी दिनुभयो । चिसोबाट बच्न ज्येष्ठ नागरिकका लागि आगो ताप्ने व्यवस्था गर्न आवश्यक स्थानमा दाउरा वितरण कार्य जारी रहेको साझेदारीले जनाएको छ ।
घरमा आर्थिक कमजोर गरिब समुदायका परिवारहरु आगो बालेर शरिर तताउने गरेको स्थानियले बदरु रैदासले बताउनु भयो । निरन्तर शीतलहरका कारण चिसो बढेपछि कपिलवस्तुका धेरै विद्यालयका विद्यार्थी समेत विद्यालय उपस्थित हुन छाडेका छन । कतिपय स्थानिय तहका विद्यालयमा जाडो विदा दिइएको छ ।
