डुङ्गा दुर्घटनामा २५ को मृत्यु, ९ बेपत्ता
काठमाडौं । दक्षिण क्यालिफोर्नियाको सान्टा क्रुज द्वीपमा सोमबार मध्यरात डुङ्गामा एक्कासी आगलागी हुँदा २५ जनाको मृत्यु भएको छ ।
दुर्घटनामा अन्य ९ व्यक्ति बेपत्ता भएको स्थानीय सञ्चार माध्यमले जनाएका छन् । क्यालिफोर्नियाको तटीय क्षेत्रमा उक्त दुर्घटना भएको हो ।
बेपत्ता व्यक्तिको खोजी तथा उद्धार कार्य जारी रहेको प्रहरीले जानकारी दिएको छ ।
स्थानीय समयानुसार सोमबार बिहान ३ः१५ बजे डुङ्गा दुर्घटना भएको तटीय गार्डका क्याप्टेन मोनिका रोचेस्टरले बताउनुभएको छ ।
डुङ्गामा ३९ व्यक्ति सवार रहेका पनि मोनिकाले बताउनुभएको छ । दुर्घटनाबाट पाँच जनालाई भने जीवितै उद्धार गरिएको जनाइएको छ ।
