भाेजपुरकाे २ वटा वडा कार्यालयमा आगजनी
मंसिर २५,
भोजपुर – भोजपुरको दुई वटा वडा कार्यालयमा नचिनेको मानिसको समूहले आगजनी गरेका छन् ।
रामप्रसादराई गाउँपालिका २ को धोद्लेखानी वडा कार्यालय र पौवादुङमा ३ को च्याङ्ग्रे वडा कार्यालयमा मंगलबार राति नचिनेको मानिसको समूहले आगजनी गरेको प्रहरीले जनाएको छ ।
पौवादुङ ३ को च्याङ्ग्रे वडा कार्यालयमा मट्टीतेल छर्केर कागज पत्र, कुर्सी, फर्निचरलगायतका सामग्रीमा आगजनी भएको गाउँपालिकाकी उपाध्यक्ष सम्झना राईले जानकारी दिनुभयो । वडा कार्यालयको ढोका ह्याक्सोले काटिएको छ ।
यता रामप्रसादराई गाउँपालिका २ को वडा कार्यालय भने पूर्णरुपमा ध्वस्त भएको छ । घटनाको जानकारी पाउनासाथ प्रहरी घटनास्थलमा पुगेको छ ।
