नारायणी नदीमा चल्ने भो दुई तले पानी जहाज

चितवन । नारायणी नदीमा दुई तले पानी जहाज चल्ने भएको छ । पानी जहाजको नदीमा सफल परीक्षण गरिएको छ । राइनो वाटर इन्टरटेनमेन्ट कम्पनीले निर्माण गरेको दुई सय २० यात्रु क्षमताको मिनी पानी जहाजको परीक्षण सफल भएको हो ।

जहाजलाई भरतपुर–१६ को काभ्रेघाटमा रहेको पोर्ट नजिकै २५ यात्रुसहित परीक्षण गरिएको थियो । परीक्षण गर्नलाई भारतबाट प्राविधिक टोली आएको कम्पनीका प्रबन्धक निर्देशक रामचन्द्र कँडेलले जानकारी दिनुभयो ।

जहाजमा रङ लगाउन, टेबुल, कुर्सी राख्ने, बार र शौचालय बनाउने काम बाँकी छ । जहाजको ९० प्रतिशत काम पूरा भएकाले चाँडै नै निर्माण पूरा गरेर नियमित सञ्चालनमा ल्याउने कँडेलको भनाइ छ ।

१५ करोड रुपैयाँ लगानी गरेर बनाइएको साढे दुई तले क्रुजसीपमा २० जना कर्मचारीसहित दुई सय २० यात्रु सयर गर्न मिल्नेछ । एक सय फिट लम्बाई, २२ फिट चौडाई र २५ फिट उचाइको क्रुजसीपको तौल ६० टनको हुनेछ भने यसले ३ सयदेखि चार सय टन बोक्न सक्नेछ ।