सुनसरीमा सवारी दुर्घटना, तीनजनाको मृत्यु, दुई घाइते

विराटनगर – पूर्व पश्चिम राजमार्ग अन्तर्गत सुनसरीको कोशी कटान क्षेत्रमा आज बिहान भएको सवारी दुर्घटनामा तीन जनाको मृत्यु भएको छ। घटनामा परी दुई जना घाइते भएका छन्।

पूर्वपश्चिम राजमार्गस्थित सुनसरीको कोशी गाउँपालिका ८ मा हायसले विपरीत दिशाबाट आइरहेको मोटरसाइकल र भ्याजिक भ्यानलाई ठक्कर दिँदा उनीहरुको मृत्यु भएको सुनसरी प्रहरीले जनाएको छ।

जिल्ला प्रहरी कार्यालय सुनसरीका प्रवक्ता एवं डिएसपी नरेन्द्र कार्कीका अनुसार दुर्घटनामा परी मोटरसाइकल चालक सप्तरी डाक्नेश्वरी ५ का २८ बर्षीय उदय साह ,पछाडि सवार बिराटनगर ९ का राम प्रसाद शाह साह र म्याजिक चालक विराटनगरका अक्षयकुमार गुप्ता रहेको छन्। तीनै जनाको उपचारको क्रममा इनरुवा अस्पतालमा मृत्यु भएको हो।

पुर्वबाट पश्चिमतर्फ गइरहेको बा ३ ख ७२४४ नम्बरको हाइसले ओभरटेक गर्नेक्रममा पश्चिमबाट पुर्वतर्फ आइरहेको स १ छ ४६६१ नम्बरको मोटरसाइकल र बा ३ ख ९३६८ नम्बरको म्याजिकलाई ठक्कर दिएको थियो। हायसले शुरुमा मोटरसाइकललाई ठक्कर दिएको थियो । मोटरसाइकल उछिट्टीएर सडकबाट तल झरेको थियो।

त्यसपछि हायसले पुनः पश्चिमबाट पुर्वतर्फ आइरहेको म्याजिक भेनलाई पनि ठक्कर दिएको डिएसपी कार्योर्कीले बताउनुभयो ।

दुर्घटनामा हायस चालक नुवाकोट विदुर नगरपालिकाका ३५ वर्षीय विकास तामाङ सामान्य घाइते छन् भने सहचालक नारायण बस्यालको खुट्टा भाच्चिएको प्रहरीले जनाएको छ।