प्रिन्स जुनियरतर्फ विश्व वरियताको शीर्ष स्थानमा

काठमाडौं- नेपाली युवा ब्याडमिन्टन स्टार प्रिन्स दाहाल ब्याडमिन्टन जुनियरतर्फ विश्व वरियताको शीर्ष स्थानमा उक्लिएका छन्। उनले प्राप्त गरेको यो उपलब्धि नेपाली ब्याडमिन्टनमा कुनै पनि समूहमा सर्वाधिक उच्च हो।

विश्व ब्याडमिन्टन महासंघ (बिडब्लुएफ) ले मंगलबार सार्वजनिक गरेको नयाँ वरियतामा शीर्षस्थानमा उक्लिँदै प्रिन्सले इतिहास बनाएका हुन्। पछिल्ला वर्षहरुमा लगातार वरियता सुधार गर्दै आएका उनले गत वर्ष आफूलाई तेस्रो स्थानमा राखेका थिए।

सन् २०२१ मा कोरोना महामारीका कारण अन्तर्राष्ट्रिय प्रतियोगिता हुन नसक्दा वरियता एक वर्षपछि परिवर्तन भएको हो। प्रिन्सको वरियतामा १० हजार ४०० अंक छ। कोरोना महामारीका कारण पछिल्लो समय अन्तर्राष्ट्रिय प्रतियोगिता हुन नसक्दा उनको अंकमा पनि परिवर्तन भएको छैन।

मलेसियाका जस्टिन हो ९५९० अंकसहित दोस्रो स्थानमा रहँदा मलेसियाकै मोहम्मद रजिफ ६९२५ अंकसहित तेस्रो स्थानमा छन्।