सुदूर पहाडमा बाक्लो हिमपात
बैतडी- बैतडीसहित सुदूरपश्चिमका पहाडी जिल्लामा बाक्लो हिमपात भएको छ । हिमपातका कारण यातायात, बिजुली र टेलिफोन सेवा अवरुद्ध भएको छ । बैतडीको खोड्पे, अनारखोली, सतबाँझ, ग्वाल्लेक, श्रीभवरलगायतका ठाउँमा चार फिट बाक्लो हिमपात भएको छ ।
बिहीबार साँझदेखि परेको हिमपातका कारण तराईबाट पहाडी जिल्लाका लागि छुटेका सवारी साधन डोटीको गैरा, डडेल्धुराको भतकाँडा, बैतडीको अनारखोली र खोड्पेमा रोकिएको जिल्ला प्रहरी कार्यालय बैतडीले जानकारी दिएको छ ।
हिमपातले बैतडी, बझाङ, दार्चुला र डडेलधुरामा यातायात अवरुद्ध भएको जिल्ला प्रहरी कार्यालय बैतडीका सूचना अधिकारी प्रहरी निरीक्षक दर्शन खड्काले बताउनुभयो । हिमपातका फसेका सवारी साधन सूचारु गर्न हिउँ सफा गर्ने प्रयास भइरहेको उहाँले बताउनुभयो ।
हिमपातका कारण बैतडीको खोड्पेमा टेलिफोन र बिजुली र खानेपानी बन्द भएको स्थानीयवासी मोहन विष्टले बताउनुभयो । चिसोले जनजीवन कष्टकर बनेको विष्टले बताउनुभयो ।
“खोड्पेमा चार फिट बाक्लो हिमपात भएको छ । यातायातका साधन रोकिएका छन् । बझाङ, दार्चुला जाने गाडीका यात्रु चिसोले समस्यामा परेका छन्,” विष्टले भन्नुभयो,“ बजार बन्द छ । बाक्लो हिमपातका कारण गाउँबाट किसानले दूध, तरकारी लगायतका वस्तु बिक्री गर्न आउन सकेका छैनन् ।”
