पुटिनको चेतावनी – पश्चिमा नाकाबन्दी ‘युद्धको घोषणा’ सरह
काठमाडौं– रुसी राष्ट्रपति भ्लादिमिर पुटिनले पश्चिमा मुलुकहरूले आफ्नो मुलुकमाथि लगाएका नाकाबन्दी र प्रतिबन्धहरू ‘युद्धको घोषणा’ सरह भएको चेतावनी दिएका छन् । राजधानी मस्कोस्थित एरोफ्लोट एअरलाइन्सको तालिम केन्द्रमा महिला सहचालकहरुलाई सम्बोधन गर्ने क्रममा पुटिनले यस्तो बताएका हुन् । ‘धन्य ईश्वर यस्तो भएको छैन ।’ पुटिनले भने ।
उनले युक्रेनी आकासमा ‘नो फ्लाइ जोन’ को घोषणा गरेमा त्यसले यस्तो घोषणा गर्ने मुलुकविरुद्ध मुठभेडको अवस्था ल्याउने र रुसले तिनीहरूलाई दुश्मन सैनिकको रुपमा व्यवहार गर्ने चेतावनी समेत दिए ।
युक्रेनी राष्ट्रपति भोलोदिमिर जेलेन्स्कीतर्फ लक्षित उनको चेतावनी थियो, ‘वर्तमान नेतृत्वले के बुझ्न जरुरी छ भने यदी उनीहरुले जे गरिरहेका छन्, त्यसैलाई निरन्तरता दिए भने यसले युक्रेनी राज्यव्यवस्थाकै भविष्य जोखिममा पार्नेछ ।’
उनले रुसमा सैनिक कानून ‘मार्शल ल’ लागू गर्ने आफ्नो कुनै योजना नरहेको पनि स्पष्ट पारे । ‘सैनिक गतिविधिको निश्चित क्षेत्रमा बाहिरी आक्रमण भएको खण्डमा’ मात्रै सैनिक कानून लागू गरिने र हालसम्म यस्तो अवस्था नआएको उनको भनाइ छ ।
केही समययता अन्तर्राष्ट्रिय सञ्चारमाध्यमहरूमा रुसमा सैनिक कानून लागू हुनै लागेको समाचारहरु आइरहेका बेला पुटिनको यस्तो भनाइ आएको हो । रुसले युक्रेनमा हमलाहरू जारी राखेका बेला आएको पुटिनको बयानलाई निकै अर्थपूर्ण रुपमा हेरिएको अन्तर्राष्ट्रिय सञ्चारमाध्यमहरुले जनाएका छन् ।
