प्रदेशस्तरीय अस्पतालको टेण्डर आवहान भएको १ बर्ष वित्यो तर काम सुरु भएन

२०७९, १ असार बुधबारमा प्रकाशित

सनिउल्ला धोबी-
कपिलवस्तु- कपिलवस्तुको शिवराज नगरपालिका चन्द्रौटामा प्रदेशस्तरीय सरुवा रोग अस्पतालको टेण्डर भएको एक बर्ष वित्दा पनि अझैसम्म काम सुचारु हुन सकेको छैन । स्वास्थ्य मन्त्रालयले भवन निर्माणका लागि २०७८ असार ३० गते टेण्डर प्रकाशित गरेको थियो ।
मन्त्रालयले विविध कारण देखाएर भवन निर्माण कार्य अझैसम्म सुरुवात नहुदाँ यस क्षेत्रका नागरिकहरुले गुनासो गरेका छन । प्रदेशस्तरीय सरुवा रोग अस्पतालको लागि ढिलाई भएपछि यहाँका नागरिक सरकार प्रति रुष्टता व्यक्त गरेका छन ।

संघको स्वास्थ्य तथा जनसख्यां मन्त्रालय मार्फत योजना स्वीकृत भई टेण्डर समेत भएको अस्पताल निर्माणको काम अझैसम्म सुरु हुन नसक्नु दुखत भएको स्थानिय रहिश शाहले बताउनुभयो ।

प्रदेशस्तरीय सरुवा रोग अस्पताल चन्द्रौटामा ल्याउनका लागि पहल गरेका लुम्बिनी प्रदेशका प्रदेश सभा सदस्य अर्जुन कुमार केसीले अब केही महिनामा अस्पतालको भवन निर्माणको कार्य सुरु हुने बताउनुभयो ।

सांसद केसीले भन्नुभयो “संघबाट बजेट निकासा भई प्रदेश स्वास्थ्य मन्त्रालयमा आएको छ, प्रदेश स्वास्थ्य मन्त्रालयले शहरी विकास कार्यालयलाई भवन निर्माणको लागि ठेक्का दिइसकेको छ ।”

चन्द्रौटा हाटबजार नजिकैको पुर्व पट्टि, महेन्द्र राजमार्ग सडक छेउमा रहेको बन क्षेत्रमा पर्ने ९ विगाहा जग्गामा अस्पताल बन्ने लगभग पक्का भएको छ । अस्पताल निर्माणका लागि करीब २ अर्व लागत लाग्नेछ । अस्पतालको निर्माण अवधि २ वर्ष लाग्न सक्ने अनुमान गरिएको छ ।

लुम्बिनी प्रदेश सरकारले आर्थिक वर्ष ०७७।०७८ को बजेटमा प्रदेश स्तरीय सरुवारोग अस्पताल शिवराज नगरपालिकाको चन्द्रौटा क्षेत्रमा निर्माण गरीने उल्लेख गरेको थियो ।