यातायात कार्यालय सुर्खेतमा मन्त्रीको छड्के अनुगमन

कर्णाली प्रदेशका भौतिक पूर्वाधार तथा सहरी विकास मन्त्री पदम बहादुर रोकायाले यातायात कार्यालय सुर्खेतमा छड्के अनुगमन गरेका छन् । बिहीबार उनले यातायात कार्यालयको अवस्था र सेवाग्राहीले भोग्नुपरेको समस्याबारे जानकारी लिएका हुन् ।

अनुगमनका क्रममा यातायात कार्यालयमा कर्मचारीहरुको लापरबाही देखिएको मन्त्री रोकायाले बताए । दुई जना कर्मचारी आफूखुसी विदामा बसेको, केही फाँटहरूमा कर्मचारी नै नभेटिएको र कर्मचारी सरकारी पोसाकमा उपस्थित नभएको उनले बताए । साथै कर्मचारीहरुले आफ्नो परिचयपत्र समेत नलगाउने गरेको मन्त्री रोकायाले बताए ।

मन्त्री रोकायाले कर्मचारीलाई लापरबाही नगरेर चुस्त र सहज रुपमा सेवा प्रदान गर्न निर्देशन समेत दिए । यातायात व्यवस्था कार्यालयमा प्रमुख आनन्द चपाइँले सेवाग्राहीको चाप अत्याधिक हुने गरेको बताए ।