कृष्णनगर–१ का महिला स्वास्थ्य स्वयंसेविकालाई साइकल
कपिलवस्तु- कपिलवस्तुको कृष्णनगर नगरपालिका वडा नं १ को कार्यालयले स्वास्थ्य क्षेत्रमा सक्रिय महिला स्वास्थ्य स्वयंसेविकाहरुलाई साइकल वितरण गरेको छ ।
स्वास्थ्य सेवा प्रवाहमा लामो समयदेखि सक्रिय भूमिका निर्वाह गर्दै आएका स्वयंसेविकालाई प्रोत्साहनस्वरूप साइकल वितरण गरिएको वडाध्यक्ष टुङनाथ चौधरीले जानकारी दिनुभयो ।
वडाका १६ जना महिला स्वास्थ्य स्वयंसेविकालाई साइकल वितरण गरिएको वडासचिव किरण श्रीवास्तवले जानकारी दिनुभयो । कार्यक्रममा वडा सदस्यहरूको समेत उल्लेखनीय सहभागिता रहेको थियो ।
साइकल प्राप्त गरेपछि महिला स्वास्थ्य स्वयंसेविकाहरू खुसी भएका छन् । उनीहरूले यसले कार्यक्षेत्रमा आवतजावतमा सहजता ल्याउने र सेवा प्रवाहमा थप उत्साह मिल्ने बताएका छन् ।
वडाले आगामी दिनमा पनि स्वास्थ्य तथा सामाजिक सेवामा संलग्न व्यक्तिहरूको हौसला बढाउने खालका कार्यक्रम सञ्चालन गर्दै लैजाने जनाएको छ ।
