बृजेश कुमार गुप्ताको भावुक प्रतिक्रिया -“जनताकै चाहनाअनुसार निर्णय लिएको हुँ”

न्युजसेन्टर नेपाल 

कपिलवस्तु– पूर्व प्रतिनिधि सभा सदस्य तथा पूर्वमन्त्री बृजेश कुमार गुप्ताले पछिल्लो समय सामाजिक सञ्जालमा आफूलाई लिएर उठेका विभिन्न टिप्पणी र बहसप्रति स्पष्ट धारणा सार्वजनिक गरेका छन् ।

सकारात्मक र नकारात्मक दुवै खालका प्रतिक्रियालाई सम्मानका साथ लिएको उल्लेख गर्दै उनले जनता नै आफ्नो सबैभन्दा ठूलो शक्ति र मार्गदर्शक भएको बताएका छन् ।

सम्पूर्ण क्षेत्रवासी दाजुभाइ तथा दिदीबहिनीप्रति नमस्कार व्यक्त गर्दै गुप्ताले निर्वाचनमा आफूलाई विजयी बनाउने र पराजित गर्ने अधिकार पनि जनताकै हातमा रहेको स्पष्ट पारेका छन् । “जनताकै विश्वासले मलाई राजनीतिमा ल्यायो, जनताकै निर्णयलाई म सधैँ शिरोधार्य गर्छु,” उनले बताएका छन् ।

आफू मूलतः एक साधारण इन्जिनियर रहेको स्मरण गराउँदै गुप्ताले क्षेत्रवासीको माया, विश्वास र उत्साहले नै राजनीतिक यात्रामा अघि बढ्न प्रेरित गरेको बताए । “तपाईंहरू बिना म केही पनि होइन,” भन्दै उनले आफ्नो सम्पूर्ण जीवन जनसेवामा समर्पित रहेको उल्लेख गरेका छन् ।

यसपटक प्रतिनिधि सभा सदस्यका रूपमा योग्य नठानिएको स्वीकार गर्दै उनले आफूमा पनि मानवीय कमजोरीहरू रहेको बताए । यदि जनताले राजनीतिबाट सन्यास लिनुपर्ने भावना बनाएका छन् भने त्यसलाई पनि खुसीका साथ स्वीकार गर्ने उनको भनाइ छ ।

तर आफूभित्र देश र समाजलाई राम्रो बनाउने सपना, सोच र योजना प्रशस्त रहेको उल्लेख गर्दै सही अवसर र परिस्थिति नमिलेकै कारण ती सपना पूर्ण रूपमा साकार हुन नसकेको उनले बताए ।
देशमा घटेका विभिन्न घटनाक्रम र Gen Z का युवाहरूको आग्रहले आफूलाई नयाँ जिम्मेवारीको बोध गराएको गुप्ताको भनाइ छ । ती युवाहरूको आवाज र भावनाले आफूलाई नयाँ बाटो रोज्न प्रेरित गरेको बताउँदै उनले सबैको सम्मान र भावना आत्मसात् गर्दै अघि बढ्ने प्रतिबद्धता जनाएका छन् ।

अन्त्यमा गुप्ताले जनताको माया र साथ नै आफ्नो सबैभन्दा ठूलो सम्पत्ति भएको उल्लेख गर्दै भविष्यमा फेरि अवसर पाए पूर्ण मनले सेवा गर्ने र नपाए पनि जनताको सुख–शान्तिको कामना गर्दै शान्त जीवन बिताउने बताएका छन् ।
उनले सबैप्रति धन्यवाद व्यक्त गर्दै ‘जय नेपाल’को उद्घोष गरेका छन् ।