महाराजगञ्ज–१० हरदौना, कपिलवस्तुमा कम्बल वितरण कार्यक्रम सम्पन्न
कपिलवस्तु — युवा समाजसेवी रहमतुल्लाह मुसलमान विगत केही वर्षदेखि निरन्तर रूपमा समाजसेवामा संलग्न रहँदै आउनुभएको छ। उहाँले समाजका गरिब, असहाय, जेष्ठ नागरिक तथा विपन्न वर्गलाई लक्षित गरी विभिन्न मानवीय तथा सामाजिक सेवा कार्यक्रमहरू सञ्चालन गर्दै आउनुभएको छ।
विभिन्न माध्यम तथा सहयोगको समन्वयमा उहाँले हालसम्म तीन पटक निःशुल्क आँखा शिविर सञ्चालन गरी हजारौँ मानिसहरूलाई प्रत्यक्ष लाभ पुर्याइसक्नुभएको छ। ती शिविरहरूबाट दृष्टि समस्या भएका सर्वसाधारणले निःशुल्क जाँच, उपचार तथा आवश्यक परामर्श पाएका थिए। यस्ता कार्यक्रमहरूले ग्रामीण तथा आर्थिक रूपमा कमजोर समुदायमा ठूलो राहत पुर्याएको स्थानीयवासीहरूको भनाइ छ।
त्यसैगरी, समाजसेवी मुसलमानले युवा तथा विद्यार्थीहरूलाई स्वतन्त्र रूपमा साथ, सहयोग र समर्थन गर्दै आउनुभएको छ। शिक्षा, सामाजिक चेतना र युवाहरूको सक्रिय सहभागितालाई प्राथमिकतामा राख्दै उहाँले युवालाई सकारात्मक दिशातर्फ अघि बढ्न प्रेरित गर्दै आउनुभएको छ।
यही सामाजिक उत्तरदायित्वलाई निरन्तरता दिँदै आजको मिति २०८२ साल ०९ महिना २६ गते महाराजगञ्ज नगरपालिका–१०, हरदौना, कपिलवस्तुमा गरिब, असहाय तथा जेष्ठ नागरिकहरूलाई लक्षित गरी कम्बल वितरण कार्यक्रम सफलतापूर्वक सम्पन्न भएको छ।
समाजसेवी रहमतुल्लाह मुसलमानको पहल तथा सक्रियतामा आदरणीय राम करण मालीका पिताज्यू प्रह्लाद मालीद्वारा प्रदान गरिएको व्यक्तिगत आर्थिक सहयोगबाट उक्त कार्यक्रम सञ्चालन गरिएको हो। चिसो मौसमका कारण दैनिक जीवनयापनमा कठिनाइ भोगिरहेका स्थानीय नागरिकहरूलाई कम्बल वितरण गरिएको कार्यक्रममा उल्लेखनीय संख्यामा लाभग्राहीहरू सहभागी थिए।
कार्यक्रममा स्थानीय समाजसेवी, युवाहरू तथा विभिन्न क्षेत्रका व्यक्तिहरूको उपस्थिति रहेको थियो। सहभागीहरूले यस्ता मानवीय कार्यले समाजमा आपसी सहयोग, सद्भाव र एकताको भावना मजबुत बनाउने बताएका छन्।
कार्यक्रम सफल बनाउन आर्थिक, भौतिक तथा व्यवस्थापकीय रूपमा सहयोग पुर्याउने सम्पूर्ण सहयोगी दाजुभाइहरू, युवाहरू तथा सहभागीहरूप्रति आयोजक पक्षले हार्दिक धन्यवाद व्यक्त गरेको छ। समाजसेवी रहमतुल्लाह मुसलमानले आगामी दिनहरूमा पनि यस्ता सामाजिक सेवा कार्यक्रमहरूलाई निरन्तरता दिइने प्रतिबद्धता व्यक्त गर्नुभएको छ।
