टी–२० आईमा सर्वाधिक रन बनाउने पाँच नेपाली

नेपाली टोलीका उपकप्तान दीपेन्द्रसिंह ऐरीले टी–२० आई क्रिकेटमा दुई हजार रन पूरा गरेका छन् । आइसिसी टी–२० विश्वकपअन्तर्गत आइतबार समूह ‘सी’को खेलमा दीपेन्द्रले इंग्ल्यान्डविरुद्ध ४४ रन जोड्दै टी–२० आईमा दुई हजार रन पूरा गरेका हुन् । उनी यो सफलता चुम्ने नेपालका पहिलो ब्याट्सम्यान हुन् । सन् २०१४ मा नेपालले पहिलोपटक टी–२० आई खेलेको थियो । टी–२० खेल्ने पहिलो पुस्ताका नेपाली खेलाडीमध्ये पूर्वकप्तान ज्ञानेन्द्र मल्लले ४५ खेलमा आठ सय ८३ रन जोडेका छन् । पारस खड्का, ज्ञानेन्द्र, शरद भेसवाकर तथा शक्ति गौचनको पुस्तापछिका पाँच खेलाडीले टी–२० आईमा एक हजारदेखि दुई हजार रन बनाएका छन् ।

१. दीपेन्द्रसिंह ऐरी : खेल ९१, इनिङ्स ७९, रन २ हजार, १ शतक, १० अर्धशतक
मुम्बईको वानखेडे रंगशालामा दुईपटकको च्याम्पियन इंग्यान्डविरुद्ध ४४ रन बनाउँदै दीपेन्द्रले दुई हजार रन पूरा गरेका हुन् । उनले ९१ खेलमा ७९ इनिङ्समा यो सफलता चुमेका हुन् । टी–२० आई इतिहासमा उनको नाममा केवल नौ बलमा अर्धशतकीय इनिङ्सको विश्व रेकर्ड छ । जुन अहिलेसम्म उनको रेकर्ड कसैले पनि तोड्न सकेका छैनन् । उनले सन् २०२३ मा १९औँ एसियन गेम्समा मंगोलियाविरुद्ध रेकर्ड बनाएका थिए । उनले ३४ टी–२० आईमा एक हजार रन जोडेका थिए । सन् २०२२ मा उनले त्रिवि क्रिकेट मैदानमा मलेसियाविरुद्ध शतकीय इनिङ्स खेलेका थिए । उनले मलेसियाविरुद्ध ५७ बलमा १० चौका र ६ छक्का प्रहार गरे ।

सन् २०१८ मा दीपेन्द्रले नेदरल्यान्ड्सविरुद्ध टी–२० आईमा डेब्यु गरेका थिए । वर्षाका कारण खेल रद्द भएको प्रतिस्पर्धामा नेपालले ब्याटिङ गर्ने अवसर पाएन । दीपेन्द्रले ६८ एकदिवसीय खेलमा एक हजार दुई सय ४१ रन बनाएका छन् । उनी ५० ओभरको खेलमा नेपालका लागि सर्वाधिक रन बनाउनेमा पाँचाैँ स्थानमा छन् । दीपेन्द्रले टी–२० आईमा ६० विकेट पनि लिएका छन् । नेपालबाट टी–२० आईमा धेरै विकेट लिने उनी पाँचाैँ बलर हुन् ।

२. कुशल भुर्तेल : खेल ७१, इनिङ्स ६९, रन १८३६, शतक १, अर्धशतक १३
नेपालका लागि टी–२० आईमा दोस्रो सर्वाधिक व्यक्तिगत रन जोड्ने ब्याट्सम्यान भुर्तेल हुन् । उनले ७१ टी–२० आईमा एक शतक तथा ११ अर्धशतकको सहयोगमा एक हजार आठ सय ३६ रन जोडेका छन् । उनले १०औँ संस्करणको टी–२० विश्वकपअन्तर्गत इंग्ल्यान्डविरुद्ध २७ रन बनाए । उनले सन् २०२१/०२२ को सिजनमा एक शतकीय इनिङ्स खेले । उनले एसियाली भूमिमा ५७ खेलमा एक हजार चार सय ८६ रन बनाएका छन् । यसैगरी, अमेरिकाको भूमिमा १० टी–२० आईमा दुई सय १७ रन जोडेका छन् । युरोपियन मैदानमा भुर्तेलले चार खेलमा एक सय ३३ रन बटुलेका छन् । उनले सबैभन्दा बढी रन नेदरल्यान्ड्सविरुद्ध प्रहार गरेका छन् । नेदरल्यान्ड्सविरुद्धको नौ खेलमा उनले तीन सय ३९ रन जोडेका छन् । त्यसपछि ओमानविरुद्ध उनले सात खेलमा दुई सय १९ रन बटुले । सन् २०२५ को सिजनमा उनको ब्याटबाट पाँच सय नौ रन निस्केको थियो । उनले सन् २०२१ मा त्रिवि क्रिकेट मैदानमा नेदरल्यान्ड्सविरुद्ध डेब्यु गरेका थिए ।

३. रोहित पौडेल : खेल ७७, इनिङ्स ७३, रन १६७६, अर्धशतक ८
नेपालका कप्तान रोहितले एकदिवसीय फर्म्याटमा दुई हजार रन पूरा गरिसकेका छन् । यो सफलता चुम्ने पहिलो नेपाली खेलाडी हुन् । उनले टी–२० आई फर्म्याटमा भने एक हजार ६ सय ७६ रन जोडेका छन् ।

नेपालका लागि टी–२० आई इतिहासमा धेरै व्यक्तिगत रन बनाउने उनी तेस्रो ब्याट्सम्यान हुन् । उनले आफ्नो करिअरमा आठपटक अर्धशतकीय इनिङ्स खेलेका छन् । रोहितले एसियाली भूमिमा ५८ खेलमा सर्वाधिक एक हजार दुई सय ३१ रन बनाएका छन् । अमेरिकाको भूमिमा उनले १० खेलमा दुई सय दुई रन जोडेका छन् । उनले अमेरिकामा एक र एसियाली भूमिमा आठ अर्धशतक लगाएका छन् । घरेलु मैदानमा उनले २३ टी–२० आईमा ६ सय ३१ रन, अवेमा तीन सय ६२ रन तथा तटस्थ भूमिमा ६ सय ८३ रन जोडेका छन् । उनले त्रिवि क्रिकेट मैदानमा चार अर्धशतकीय इनिङ्स खेलेका छन् । रोहितले सन् २०१९ मा युएईविरुद्ध डेब्यु गरेका थिए ।

४. आसिफ शेख : खेल ६९,  इनिङ्स ६८, रन १६४६, अर्धशतक १०
नेपालका लागि टी–२० आईमा चौथो धेरै रन बनाउने आसिफ हुन् । उनले ६७ इनिङ्समा आठ अर्धशतकीय योगदानको सहयोगमा एक हजार ६ सय ४६ रन जोडेका छन् । सन् २०२१ मा उनले नेदरल्यान्ड्सविरुद्ध डेब्यु गरेका थिए । आसिफले सन् २०२१ देखि ०२५ सम्म एसियाली भूमिमा प्रतिस्पर्धा गर्दा नौ शतकको सहयोगमा एक हजार तीन सय ७९ रन बटुलेका छन् ।

अमेरिकन भूमिमा उनले १० खेलमा दुई सय २२ रन जोडेका छन् । यसैगरी, अफ्रिकी भूमिमा उनले दुई खेलमा प्रतिस्पर्धा गर्दा २४ रन मात्र बनाएका थिए । घरेलु मैदानमा उनले २५ खेलमा सात सय २३ रन तथा अवेमा १३ खेलमा दुई सय नौ रन जोडेका थिए । उनले तटस्थ भूमिमा ३१ खेलमा सात सय १४ रन जोडे । सन् २०२४ को सिजनमा उनी उत्कृष्ट फर्ममा थिए । यस सिजनमा उनले २१ खेलमा चार सय ५७ रन जोडेका थिए । यसैगरी, सन् २०२५ मा उनले १४ खेलमा तीन सय ९४ रन बटुले । गत सिजनमा उनले चार अर्धशतकीय इनिङ्स खेल्न सफल भए ।

५. कुशल मल्ल : खेल ५९ ,  इनिङ्स ५३, रन १००३, शतक १, अर्धशतक ४
चालू विश्वकपमा मल्लले टोलीमा स्थान बनाउन सकेनन् । दोस्रो नेपाल प्रिमियर लिगमा खराब फर्ममा रहँदा उनले विश्वकपका लागि घोषित प्रारम्भिक टोलीमा समेत स्थान रक्षा गर्न सकेनन् । यद्यपि, लगातार दोस्रोपटक विश्वकप खेल खेल्नबाट वञ्चित भए पनि उनी नेपालको टी–२० आईमा पाँचाैँ धेरै रन बनाउने खेलाडीमा पर्छन् । उनले सन् २०१९ मा सिंगापुरविरुद्ध डेब्यु गरेका थिए । डेब्यु गर्दा उनको उमेर १५ वर्ष मात्र थियो । उनले सन् २०२३ मा एसियन गेम्समा मंगोलियाविरुद्ध केवल ५० बलमा एक सय ३७ रनको शतकीय इनिङ्स खेलेका थिए । उनले टी–२० आईमा चार अर्धशतक बनाएका छन् । गत अक्टोबरयता उनी राष्ट्रिय टोलीमा छैनन् ।