सिद्धार्थको मनमोहक प्रस्तुति, पाँचौँ वार्षिकोत्सव सम्पन्न
न्युजसेन्टर नेपाल
कपिलवस्तुको शिवराज नगरपालिका–५ चन्द्रौटामा अवस्थित सिद्धार्थ बाल विकास केन्द्रको पाँचौँ वार्षिकोत्सव तथा वार्षिक परिणाम प्रकाशन कार्यक्रम भव्य रूपमा सम्पन्न भएको छ ।
कार्यक्रममा केन्द्रमा अध्ययनरत साना बालबालिकाहरूले आकर्षक नृत्य तथा सांस्कृतिक प्रस्तुति दिएका थिए । रंगीन मञ्च सजावट, गुब्बारा र झिलिमिली वातावरणबीच बालबालिकाको प्रस्तुति हेर्न अभिभावक तथा स्थानीयको उल्लेख्य उपस्थिति रहेको थियो ।
बालबालिकाले समूहगत नृत्य, अभिनय तथा गीत प्रस्तुत गर्दै दर्शकको मन जितेका थिए । साना बालबालिकाको आत्मविश्वास र सिर्जनशील प्रस्तुति देखेर उपस्थित सबै उत्साहित बनेका थिए ।
कार्यक्रमको अध्यक्षता केन्द्रका अध्यक्ष सुरेन्द्र प्रसाद चौधरीले गर्नुभएको थियो । उहाँले विद्यालयको भौतिक विकाससँगै विद्यार्थीको शैक्षिक गुणस्तर सुधारमा विशेष ध्यान दिइएको बताउनुभयो ।
कार्यक्रमका प्रमुख अतिथि शिवराज नगरपालिकाकी उपमेयर शिवकुमारी चौधरीले यस्ता कार्यक्रमहरूले विद्यार्थीमा नयाँ ऊर्जा थप्ने र समग्र शैक्षिक विकासमा महत्वपूर्ण योगदान पुर्याउने बताउनुभयो ।
केन्द्रले विगत केही वर्षदेखि मन्टेश्वरी विधिबाट शिक्षण गर्दै आएको र बालबालिकाको शारीरिक तथा सामाजिक विकासमा जोड दिँदै आएको जनाएको छ ।
कार्यक्रममा उत्कृष्ट विद्यार्थीलाई पुरस्कार वितरण गर्नुका साथै सहभागी सबै बालबालिकालाई प्रमाणपत्र प्रदान गरिएको थियो । अभिभावकहरूले यस्ता कार्यक्रमले बालबालिकाको प्रतिभा प्रस्फुटनमा सकारात्मक प्रभाव पार्ने बताएका छन् ।
