विश्वकप फाइलनमा अर्जेन्टिना र स्पेन भिड्ने , के बल्ला बिजेता
काठमाडौँ । स्पेन र साविक विजेता अर्जेन्टिना फिफा विश्वकप २०२६ को उपाधिका लागि भिड्ने भएका छन्। आ–आफ्नो सेमिफाइनल खेल जित्दै दुवै टोलीले उपाधि भिडन्त पक्का गरेका हुन्।
पहिलो सेमिफाइनलमा फ्रान्सलाई २–० ले पाखा लगाउँदै स्पेन फाइनल पुगेको हो। स्पेनको जितमा मिकेल ओयारजाबालले पेनाल्टीमार्फत पहिलो गोल गरे भने पेड्रो पोरोले दोस्रो गोल थपे।
दोस्रो सेमिफाइनलमा इङ्ल्यान्डमाथि २–१ को रोमाञ्चक पुनरागमन जित दर्ता गर्दै अर्जेन्टिनाले स्पेनसँगको भेट पक्का गरेको हो।
खेलको ५५ औं मिनेटमा मोर्गन रोजर्सको क्रसमा एन्थोनी गोर्डनले गोल गर्दै इङ्ल्यान्डलाई सुरुवाती अग्रता दिलाएका थिए। एक गोलले पछि परेको अर्जेन्टिनाका लागि निको गोन्जालेजले प्रहार गरे पनि इङ्ल्यान्डका गोलकिपर जोर्डन पिकफोर्डले उत्कृष्ट बचाउ गरे। यस्तै एलेक्सिस म्याक एलिस्टेरको दुई प्रहार पोस्टमा ठोकिएका थिए।
पहिलो हाफमा आक्रामक बन्न नसकेको अर्जेन्टिनाले खेलको अन्तिम समयतिर उत्कृष्ट पुनरागमन गर्यो। ३९ वर्षीय कप्तान लियोनल मेसीको प्रेरणामा अर्जेन्टिनाले पाँच मिनेटको अन्तरमा दुई गोल फर्काएको हो। खेल सकिन पाँच मिनेट बाँकी छँदा मेसीकै पासमा एन्जो फर्नान्डेजले शक्तिशाली प्रहार गर्दै खेललाई १–१ को बराबरीमा ल्याए।
त्यसपछि इन्जुरी समयमा मेसीले दाहिने खुट्टाले मिलाइदिएको क्रसलाई लाउटारो मार्टिनेजले गोलमा परिणत गर्दै अर्जेन्टिनाको जित निश्चित गरे। योसँगै मेसीलाई आफ्नो खेल जीवनमा दोस्रो पटक विश्वकप ट्रफी उचाल्ने अवसर जुटेको छ।
फाइनलमा मेसी र स्पेनका युवा स्टार लामिन यमलबीचको भिडन्तलाई निकै चासोका साथ हेरिएको छ।
