रोट्रयाक्ट क्लब अफ कपिलवस्तुद्वारा लागूऔषध तथा ट्राफिक सचेतना

कपिलवस्तु– रोट्रयाक्ट क्लब अफ कपिलवस्तुको आयोजनामा चन्द्रौटामा लागूऔषध तथा ट्राफिक सचेतना कार्यक्रम सम्पन्न भएको छ ।
राष्ट्रिय माध्यमिक विद्यालय चन्द्रौटामा आज विहान आयोजित कार्यक्रममा विद्यार्थी तथा युवावर्गलाई लागूऔषध दुर्व्यसनबाट जोगिन र ट्राफिक नियमको पालना गरी सुरक्षित यात्रा गर्न सचेत गराइएको थियो ।
कार्यक्रममा वडा प्रहरी कार्यालय चन्द्रौटाका प्रहरी निरीक्षक सन्तोष घिमिरे र अस्थायी ट्राफिक प्रहरी पोष्ट चन्द्रौटाका प्रमुख प्रविन खड्काले प्रशिक्षण दिनु भएको थियो ।

प्रहरी अधिकारीले लागूऔषध दुर्व्यसनका कारण हुने सामाजिक तथा व्यक्तिगत असर, लागूऔषधबाट बच्ने उपाय तथा सडक सुरक्षा र ट्राफिक नियमका विषयमा विद्यार्थीहरूलाई जानकारी गराएका थिए।

विद्यार्थी तथा युवाहरूलाई लक्षित गरी आयोजना गरिएको कार्यक्रमले लागूऔषधविरुद्ध जनचेतना अभिवृद्धि गर्नुका साथै सडक दुर्घटना न्यूनीकरण र सुरक्षित यात्राका लागि ट्राफिक नियमको महत्वबारे जानकारी दिने उद्देश्य राखेको आयोजकले जनाएको छ ।

कार्यक्रम पास्ट प्रेसिडेन्ट रो. शिशिर पोख्रेलको संयोजकत्वमा सम्पन्न भएको थियो। कार्यक्रमको सञ्चालन रो. केशव बेल्वासे र रो. केशव गैरेले गरेका थिए ।
कार्यक्रममा राष्ट्रिय मा.वि. चन्द्रौटाका शिक्षक तथा विद्यार्थी, प्रहरी प्रतिनिधि, रोट्रयाक्ट क्लबका पदाधिकारी तथा सदस्यलगायतको सहभागिता रहेको थियो ।
कार्यक्रम सफल बनाउन सहयोग गर्ने वडा प्रहरी कार्यालय चन्द्रौटा, अस्थायी ट्राफिक प्रहरी पोष्ट चन्द्रौटा, राष्ट्रिय मा.वि. चन्द्रौटा परिवार, अतिथिहरू, रोट्रयाक्ट सदस्य तथा सहभागी विद्यार्थीहरूलाई आयोजकले धन्यवाद व्यक्त गरेको छ ।