कालोपत्र भएको विमानस्थल परीक्षण उडानमै सीमित

खोटाङ – खोटाङको रावाबेँसी गाउँपालिका ३ को लामीडाँडा विमानस्थल उपयोगविहीन बनेको छ । कालोपत्र गरिएपछि २०७६ असार ३ गते सफल परीक्षण उडान गरिएको लामीडाँडा विमानस्थलमा नेपाल नागरिक उड्डयन प्रधिकरणले नियमित उडानको व्यवस्था गर्न नसकेको हो ।

खोटाङका तीन वटा विमानस्थलमध्ये लामीडाँडा विमानस्थल सबैभन्दा पुरानो विमानस्थल हो । कालोपत्र भएको विमानस्थल परीक्षण उडानमै सीमित भएपछि स्थानीयवासी निराश छन् ।

साविकको सदरमुकाम दिक्तेल नजिकै मनमायाँ राई खानीडाँडा विमानस्थल सञ्चालनमा आएपछि लामीडाँडा विमानस्थल बन्दजस्तै बन्न पुगेको हो । दिक्तेल रुपाकोट मझुवागढी नगरपालिका ४ खाल्लेमा रहेको खानीडाँडा विमानस्थलमा बेला–बेला उडान भइरहँदा लामीडाँडा विमानस्थल सुनसान छ ।

कालोपत्र गर्नुअघि उडान हुँदै आएको लामीडाँडा विमानस्थलमा कालोपत्र गरेपछि भने उडान रोकिएको हो । तालिकामा उडान नहुँदा र यात्रु नपाउँदा लामीडाँडामा उडान रोकिएको स्थानीय युवा नेता खेमराज देउसालीले बताउनुभयो ।

२०२८ सालदेखि सञ्चालनमा आएको लामीडाँडा विमानस्थलमा उडान नहुँदा रावाबेँसी, ऐसेलुखर्क र केपिलासगढी गाउँपालिका, ओखलढुङ्गाको कुइभीर र सोलुखुम्बुका केही ठाउँका बासिन्दा बढी मारमा परेका छन् ।