बर्दियास्थित नेपाल–भारत सीमानामा गोली चल्यो- एक नेपालीको मृत्यु

बर्दियास्थित नेपाल भारत सीमानाको जंगलमा गोली चलेको छ । गोली लागेर निउरो टिप्न गएका एकजनाको मृत्यु भएको छ । गुलरिया नगरपालिका–३ घर भएका ५४ वर्षका हेमराज गोडियाको उपचारको क्रममा मृत्यु भएको बर्दियाका एसपी बीरेन्द्रबहादुर शाहीले बताउनु भयो ।
असार १६ मा बिहान ११ बजे गोडिया निउरो टिप्न भारतर्फका कतर्नियाघाट वाइल्डलाइफ सेन्चुरीमा निउरो टिप्न गएका हुन् । साँझ पौने ८ बजेतिर उनले आफुलाई गोली लागेको भन्दै लिन आउन परिवारलाई खबर गरेका थिए । पत्नी र छोराले ल्याएर गुलरिया अस्पतालमा भर्ना गरे । उपचारको क्रममा उनको मृत्यु भएको छ ।

दायाँ खुट्टाको घुँडाभन्दा माथि गोली लागेको र घटनाबारे अनुसन्धान भइरहेको एसपी शाहीले बताए । एसपी शाहीले भने–‘भारतीय सुरक्षा अधिकारीहसँग पनि समन्वय गरेर अनुसन्धान गरिरहेका छौं ।’ गोली चलाउनेको पहिचान खुलेको छैन ।