राज्यमन्त्री विक कपिलवस्तुको नौडिहवामा
न्युज सेन्टर नेपाल, कपिलवस्तु
नेपाल सरकारका वन तथा वातावरण राज्यमन्त्री रूपा विकले कपिलवस्तुको नौडिहवा गाउँको विकासका लागि संघीय सरकारबाट विशेष योजना ल्याउने बताउनुभएको छ ।
शिवराज नगरपालिका वडा नम्बर ५ मा पर्ने नौडिहवा गाउँ विकास सूचाङ्कमा पछि परेकोले विशेष पहल आवश्यक रहेको राज्यमन्त्री विकको भनाइ छ । उहाँले संघीय सरकारको सहयोगमा गाउँको समग्र विकासका लागि योजनाबद्ध रूपमा अघि बढ्ने प्रतिवद्धता व्यक्त गर्नुभएको हो ।
नौडिहवा बासीले आयोजना गरेको स्वागत तथा अभिनन्दन कार्यक्रममा बोल्दै राज्यमन्त्री विकले कपिलवस्तुका धेरै समस्या समाधान गर्न संघीय स्तरको योजना आवश्यक रहेको औंल्याउनुभयो । कार्यक्रममा समाजसेवी एमबी सेन्चुरीले नौडिहवा गाउँको समस्या र आवश्यकताबारे राज्यमन्त्रीलाई जानकारी गराउनुभएको थियो ।
सेन्चुरीले गाउँको सडक पूर्वाधार, खानेपानी सुविधा, सामुदायिक भवनको अभावलगायतका समस्या समाधानका लागि संघीय सरकारको सहयोग आवश्यक रहेको बताउँदै राज्यमन्त्रीसँग सहयोगको आग्रह गर्नुभएको थियो ।
कार्यक्रमले नौडिहवा गाउँको विकासप्रतिको आशा थप बलियो बनाएको स्थानीयहरूले बताएका छन् ।
