कपिलवस्तुमा १ सय ४५ पोइन्ट रगत संकलन
राष्ट्रिय विपत्तिका बेला हुन सक्ने सम्भावित रक्त अभावलाई मध्यनजर गर्दै कपिलवस्तुको शिवराज नगरपालिका–३, खरेन्द्रपुरमा आयोजित एकदिवसीय खुला रक्तदान कार्यक्रमबाट १४५ पोइन्ट रगत संकलन गरिएको छ ।
रोट्रयाक्ट क्लब अफ कपिलवस्तुको आयोजनामा, रोटरी क्लब अफ कपिलवस्तु र शिवराज युथ क्लबको सहआयोजनामा तथा रक्त सञ्चार सेवा केन्द्र बुटवलको प्राविधिक सहयोगमा गौतम बुद्ध पोलिक्लिनिकमा रक्तदान कार्यक्रम सम्पन्न भएको हो ।
कार्यक्रममा शिवराज नगरपालिकाका नगर प्रमुख अजय थापाले रक्तदान मानव जीवन बचाउने महत्वपूर्ण सामाजिक सेवामध्ये एक भएको बताउनुभयो । राष्ट्रिय विपत्ति तथा आपत्कालीन अवस्थामा रगतको अभाव हुन नदिन रक्तदान कार्यक्रमले महत्वपूर्ण योगदान पुर्याउने उहाँको भनाइ थियो ।
कार्यक्रम संयोजक गोपाल बन्जाडेले सामाजिक उत्तरदायित्वअन्तर्गत रक्तदान कार्यक्रम आयोजना गरिएको बताउनुभयो । रक्तदाताहरूको उत्साहजनक सहभागिताका कारण १४५ पोइन्ट रगत संकलन गर्न सफल भएको उहाँले जानकारी दिनुभयो ।
त्यस्तै, रोट्रयाक्ट क्लब अफ कपिलवस्तुका अध्यक्ष सन्तोष पौडेलले राष्ट्रिय विपत्तिका समयमा हुन सक्ने रक्त अभावलाई ध्यानमा राखेर कार्यक्रम आयोजना गरिएको बताउनुभयो । युवाहरूलाई सामाजिक तथा मानवीय सेवामा जोड्ने उद्देश्यअनुसार क्लबले नियमित रूपमा विभिन्न सामाजिक गतिविधि सञ्चालन गर्दै आएको उहाँले जानकारी दिनुभयो ।
कार्यक्रममा विभिन्न संघसंस्थाका प्रतिनिधि, स्थानीय व्यवसायी, सामाजिक अभियन्ता तथा सर्वसाधारणको उल्लेखनीय सहभागिता रहेको थियो ।
आयोजक संस्थाहरूले कार्यक्रम सफल बनाउन सहयोग गर्ने संघसंस्था, प्राविधिक टोली, स्वयंसेवक तथा रक्तदाताहरूप्रति आभार व्यक्त गरेका छन् । आयोजकले आगामी दिनमा पनि रक्तदानलगायत मानवीय सेवाका कार्यक्रमलाई निरन्तरता दिने जनाएको छ ।
