बेलझुण्डी अस्पतालको बिजोग:अब बिरामी भर्ना गर्न सक्दैनौं: व्यवस्थापक
दाङ – एमाले नेता शंकर पोखरेलले लुम्बिनी प्रदेशको मुख्यमन्त्रीमा पुनः नियुक्तिको बधाई पाइरहँदा उनकै गृहजिल्लामा अवस्थित कोरोना विशेष अस्थायी अस्पतालमा अक्सिजन अभावले विरामीहरु छटपटाइरहनुभएको थियो । अक्सिजनको जोहो समयमै नहुँदा एकजनाको त ज्यानै गयो । दुई जना बिरामीलाई उहाँका आफन्तले हेलिकप्टर चार्टर्ड गरेर काठमाडौं पठाउनुभयो ।
उहाँहरुले व्यक्तिगत पहलमा एक–दुईवटा सिलिण्डर जसोतसो जोहो गर्थे तर ती सिलिण्डर पनि एकैछिनमा रित्तिन्थे । अस्पतालका चिकित्सक तथा कर्मचारीहरु कहिले अक्सिजन आपूर्तिकर्तालाई गाडी कतिबेला आइपुग्छ भनेर सोध्थे, कहिले नेताहरुलाई फोन गरेर अस्पतालको व्यथा सुनाउनुभयो ।
अस्पतालका व्यवस्थापक द्रोण ओलीले गाडीवालालाई टेलिफोनमा ‘४० जना विरामीहरुलाई तत्काल अक्सिजन चाहिएको छ । हामीसँग भएको अक्सिजनले राति नौ बजेसम्म मात्र पुग्छ । त्यसपछि के हुने हो थाहा छैन उहाँले भन्नु भयो ।’
व्यवस्थापक ओलीका अनुसार अस्पतालमा भर्ना हुने विरामीहरुको संख्या बढ्दो छ । तर अक्सिजनको आपूर्ति सहज र पर्याप्त छैन । अक्सिजन लिन दिनहुँ बाँकेको नेपालगञ्जसम्म धाउनुपर्छ । अक्सिजन बोकेको गाडी आइपुग्न एक घण्टामात्रै ढिलो भयो भने वा बीचबाटोमै बिग्रियो भने बिरामी ज्यान जोखिममा पर्छ ।
‘सप्लायर्सले भनेअनुसार अक्सिजन भर्ने ठाउँमा पनि पालो कुर्नुपर्छ रे । अस्पतालको अहिलेको अवस्था हेर्ने हो भने हामीलाई एक मिनेट पनि ढिलो गर्न छुट छैन,’ व्यवस्थापक ओलीले भन्नुभयाृे , ‘आइतबार एकैछिन ढिलो हुँदा तुलसीपुरका एकजना बुवालाई गुमाउनुपर्यो ।’
अक्सिजन भर्न हरेक दिन तीन घण्टाको दुरी पार गर्दै नेपालगञ्ज–बेलझुण्डी आउ–जाउ गर्नुको विकल्प छैन । अक्सिजन ढुवानी गर्ने गाडी बिग्रियो भने वैकल्पिक व्यवस्था छैन ।
‘अहिले एक दिनमा २४० वटाको दरले खपत हुन थाल्यो । यो अवस्थामा हामी एउटा गाडीको चारवटा पांग्रामा भर परिरहेका छौं,’ ओलीले भन्नुभयो , ‘धेरै पटक, धेरै ठाउँमा भनसुन गर्दा पनि अहिलेसम्म आपूर्ति सहज बनाउन सकेका छैनौं ।’
संक्रमितको संख्या थपिएसँगै अक्सिजन पनि अभाव भएकाले अब नयाँ भर्ना गर्न नसक्ने ओली बताउनुभयो । हाल अस्पतालमा ५७ जना कोरोना संक्रमित बिरामी उपचाररत रहेको जानकारी दिँदै उनले भने, ‘अक्सिजनको सहज र प्रयाप्त उपलब्ध नभएको हुँदा कसैले पनि बिरामी भर्नाको लागि सिफारिस र दबाब नगरिदिनुहुन अनुरोध गर्दछु ।’
