एमालेको नयाँ नेतृत्वको लागि ३९ जनाले मतदान गरेनन्

सौराह- नेकपा एमालेको नयाँ नेतृत्वको चुनावका लागि भएको मतदान सकिएको छ। कुल २ हजार १५३ मतदातामध्ये २ हजार ११४ मत खसेको छ। १०औं महाधिवेशन केन्द्रीय निर्वाचन आयोगका सदस्य बाबुराम दाहालका अनुसार ३९ जनाले मतदान गरेनन्। सर्वसम्मत नेतृत्व चयनको प्रयास असफल भएपछि बिहान ४ बजेजेदेखि मतदान सुरू भएको थियो।

चुनावमा अध्यक्षका लागि निवर्तमान अध्यक्ष केपी शर्मा ओली र उपाध्यक्ष भीम रावल प्रतिस्पर्धामा छन्। त्यस्तै उपाध्यक्षका लागि ओलीले घोषणा गरेकाबाहेक घनश्याम भुसाल मैदानमा छन्।

सचिवमा पनि ओलीले घोषणा गरेकाबाहेक भीम आचार्य र टंक कार्की चुनाव लडेका छन्। आचार्य यसअघि पनि सचिव थिए। सदस्यहरुका लागि पनि मतदान भएको छ। विद्युतीय भोटिङ मेसिनमार्फत मतदान गरिएकोले केही घण्टाभित्रै मतपरिणाम आउने भएको छ।