कपिलवस्तुमा ६२ प्रतिशतले लगाएनन् कोरोनाविरुद्धको खोप
कपिलवस्तु -स्वास्थ्यप्रति संवेदनशील र सचेतना नहुँदा कपिलवस्तुमा ६२ प्रतिशतले कोरोनाविरुद्धको खोप लगाएका छैनन । दोस्रो डोज लगाउने पनि ३२ प्रतिशतमात्र छन् ।
१८ वर्षमाथिका ४ लाख ५५ हजारलाई खोप लगाउनु पर्नेमा ३८ प्रतिशतले मात्रै पहिलो डोज खोप लगाएका हुन् । दुवै डोज खोप लगाउने ३२ प्रतिशतमात्रै रहेको जिल्ला स्वास्थ्य कार्यालयको तथ्यांक छ ।
कार्यालयका अनुसार १ लाख ७२ हजारले पहिलो डोज लगाए । त्यसमध्ये १ लाख ४५ हजार ६ सयले मात्रै दुवै मात्रा खोप लगाएका छन् । खोप लगाउन सुरु गरेको एक वर्ष बढी भइसक्दा पनि संख्या बढ्न सकेको छैन । सुरुमा अक्स्ट्राजेनेकाको कोभिसिल्ड लगाइएको थियो । त्यसपछि भेरोसेल र पछि जोन्सन खोप लगाइएको थियो । जोन्सन खोपको एक डोजलाई नै पूरा मात्रा मानिएको छ ।
चिनियाँ खोपप्रति सीमा क्षेत्रमा बढी नकारात्मक धारणा छ । चिनियाँ खोपले दीर्घकालमा असर र्पुयाउँछ र नकारात्मक प्रभाव बढी छन् भन्ने हल्लाले सीमा क्षेत्रमा लगाउन रुचि नदेखाएको एक स्वास्थ्यकर्मीले बताए । अन्य कम्पनीका खोपबारे पनि अचेतना र डर–त्रासका कारण स्थानीयले खासै रुचि नदेखाएको स्वास्थ्यकर्मीले बताए ।
खोपप्रति यहाँ आकर्षण नहुँदा सुरु सुरुमा बुटवल, अर्घाखाँची, पाल्पा र भैरहवासम्मका व्यक्ति आएर लगाएका थिए । लक्षित वर्ग तोकिँदा उता गाह्रो हुन्थ्यो ।
यता लगाउने नभएपछि चिनेजानेका र आफन्तले बोलाएर लगाएका थिए । मायादेवी गाउँपालिका र वाणगंगा नगरपालिकामा अन्य जिल्लाका मान्छे आएका खोप लगाएपछि स्थानीय प्रशासनले छानबिन समितिसमेत गठन गरेको थियो । यहाँ दुवै डोज खोप लगाउने ३२ प्रतिशतमा २र४ प्रतिशत अन्यत्रकै छन ।
दसवटै स्थानीय तहमा एक वर्षदेखि १० पटक खोप लगाउने अभियान चलाए पनि खोप लगाउनेको संख्या बढ्न सकेको छैन । जिल्लामा पछिल्लोपटक ८० हजार डोज एक्स्ट्राजेनेका र भेरोसेल खोप आएको छ ।
स्थानीय तहले सर्वसाधारणलाई खोप लगाइरहे पनि अपेक्षाकृत भीड छैन । जिल्लामा पहिलो पटक गत माघ १४ गतेबाट खोप लगाइएको थियो । ‘खोपप्रति पढेलेखेकाहरू सचेत छन्,’ जिल्ला स्वास्थ्य कार्यालयका कोरोना नियन्त्रण फोकल पर्सन उमेश घिमिरेले भने, ‘ग्रामीण क्षेत्रमा डरत्रास र अज्ञानताले लगाउने कम छन् ।’
