अवैध लागूऔषधसहित ६ पक्राउ

काठमाडौं :

प्रहरीले देशका विभिन्न स्थानबाट अवैध लागूऔषधसहित ६ जनालाई पक्राउ गरेको छ।दैलेखको गुँरास गाउँपालिका-४, रानीमत्ता चेकपोष्टमा जाँच गर्ने क्रममा ब्राउनसुगरजस्तो देखिने पदार्थ ११ दशमलब ५० ग्रामसहित चारजनालाई बुधबार दिउँसो प्रहरीले पक्राउ गरेको छ ।

पक्राउ पर्नेमा जुम्ला चन्दननाथ नगरपालिका-४ का २४ वर्षीय रवि मल्ल, चन्दननाथ नगरपालिका-१ का २२ वर्षीय शालिकराम महत, चन्दननाथ नगरपालिका-५ का सौगात कार्की र मुगु छाँयानाथ रारा नगरपालिका-११ का २३ वर्षीय महेलाल साउद छन्।शंकास्पद उनीहरूलाई प्रहरीले जाँच गर्ने क्रममा उक्त परिमाणको लागूऔषधसहित पक्राउ गरेको हो।

यसैगरी, नवलपरासी(पूर्व) कावासोती नगरपालिका-१६, तीनघरे चोकबाट नियन्त्रित लागूऔषध डाइजेपाम ६० एम्पुल, फेनारगन ६० एम्पुल र नुर्फिन ६० एम्पुलसहित दुईजनालाई बुधबार राति प्रहरीले पक्राउ गरेको छ।

पक्राउ पर्नेमा चितवन भरतपुर महानगरपालिका-११ का २४ वर्षीय रोशन पाठक र आइतबहादुर थिङ छन्। जिल्ला प्रहरी कार्यालयबाट खटिएको प्रहरीले लु१ख ८६२२ नम्बरको बस जाँच गर्ने क्रममा उक्त परिमाणको लागूऔषधसहित उनीहरूलाई पक्राउ गरेको हो।

घटनाबारे स्थानीय प्रहरीले अनुसन्धान गरिरहेको छ।