समीक्षा गरेर विचार, विधि र इमानका दृष्टिले माथि उठौं र उठाऔं:जनार्दन शर्मा
काठमाडौं – नेकपा (माओवादी)केन्द्रका नेता जनार्दन शर्माले परिस्थिति र घटनाले नयाँ चुनौती र सम्भावना ल्याएको भन्दै यसबाट हतास हुनेहरु समाप्त हुने बताउनुभएको छ ।
एमाले एकता र माओवादी केन्द्रको भविष्यका विषयमा विभिन्न टिकाटिप्पणी भइराखेका बेला शर्माको यस्तो भनाइ आएको हो। शर्माले चुनौति सामना गर्न नसकेर हतास हुनेहरु समाप्त हुँदै जाने बताउनुभएको हो ।
नेता शर्माले तथ्यलाई स्वीकार गर्दै विगतका उपलब्धि र कमीको गम्भीर समीक्षा गर्दै अगाडि बढ्नुपर्नेमा जोड दिनुभएको छ । शर्माले अहिले जनतामाथि संकट आइपरेकाले इमान्दार बनेर काम गरेका सबैको भविष्य उज्ज्वल हुने बताउनुभएको छ ।
‘नयाँ परिस्थिति र घटनाले नयाँ चुनौती र संभावनाहरु एकसाथ लिएर आएको हुन्छ। यसबाट हतास हुनेहरू समाप्त हुँदै जाने र सामना गर्न तयार हुनेहरू सुदृढ हुँदै जाने तथ्यलाई स्वीकार गरी विगतका उपलब्धि र कमीहरु समेतको गम्भीर समीक्षा गरेर विचार, विधि र इमानका दृष्टिले माथि उठौं र उठाऔं’, शर्माले फेसबुकमा लेख्नुभएको छ , ‘जनतामाथि आइपरेका संकटहरुको सामना गर्न जनताप्रतिको उत्तरदायित्वमा इमान्दार बनौं। हामी सबैको भबिस्य उज्ज्वल हुनेछ।’
