नेकपा विप्लवको कपिलवस्तुमा बृहत मसाल जुलुस

कपिलवस्तु,,नेपाल कम्युनिष्ट पार्टीले अदालतको पक्राउ पूर्जी विरुद्ध आज बेलुका देशभर एकैसाथ मशाल जुलुस प्रदर्शन गरेको छ । नेकपाका महासचिव विप्लवले आज बेलुका देशभर अदालतको पक्राउ पूर्जी विरुद्ध मशाल जुलुस कार्यक्रम सम्पन्न भएको जानकारी दिनुभयो ।

यसै विषयमा नेकपाले पार्टी केन्द्र्रको निर्देशनलाई पालना गर्दै आज बेलुका कपिलवस्तुको चन्द्रौटामा बृहत मसाल जुलुस कार्यक्रम सम्पन्न भएको छ । नेकपा पश्चिम कपिलवस्तुका इन्चार्ज हेमन्त चौधरी (हेमन्त सी) र जिल्ला सचिव विनोद लुइटेल (पावेल सी) को नेतृत्वमा बृहत मशाल जुलुस प्रदर्शन कार्यक्रम सम्पन्न भएको हो ।

नेकपाले ३ बुँदे सहमति र शान्ति प्रक्रियाका विरुद्ध जाने गरी जिल्ला अदालत काठमाडौले पक्राउ पूर्जी जारी गरेकोमा गम्भीर आपत्ति जनाएको छ । भोली मंसिर २० गते दिउसो ३ बजे आदेश दिने न्यायाधीशको पुत्ला जलाउने कार्यक्रम तय गरीएको नेकपा पश्चिम कपिलवस्तुका जिल्ला सचिव विनोद लुइटेलले जानकारी दिनुभयो ।

जिल्ला अदातल काठमाण्डौंले पार्टीका महासचिव विप्लव, प्रवक्ता प्रकाण्ड सहितका नेताहरुलाई पक्राउ पूर्जी सहितको गोरखापत्रमा सूचना प्रकाशित गरेको थियो ।