चारदेखि दशपटकसम्म उम्मेदवार बनेर जितहार व्यहोर्दै आएका दुई दर्जनभन्दा बढी नेता अहिले पनि चुनावी मैदानमा

विभिन्न दलले पटक–पटक चुनाव जित्ने दुई दर्जनभन्दा बढी पुराना अनुहारलाई आसन्न २१ फागुनको चुनावमा पनि उम्मेदवार बनाएका छन् । चारपटकभन्दा बढी उम्मेदवार बनेका उनीहरू यसपटक पनि चुनाव जित्ने गरी उम्मेदवार बनेका छन् । पटक–पटक उम्मेदवार बन्दा पनि अपराजित भएकैले उनीहरू पुन: चुनाव जित्न सकिनेमा आशावादी छन् ।

०३८ देखि हरेक चुनावमा लगातार उम्मेदवारी दिँदै आएका जसपा नेपालका नेता शरत्सिंह भण्डारीले महोत्तरी २ बाट पुन: दसौँपटक उम्मेदवारी दिएका छन् । तीमध्ये उनले अहिलेसम्म ६ पटक अपराजित यात्रा तय गरेर अबको चुनावमा जित्ने दौडमा छन् । ०३८ मा तत्कालीन राष्ट्रिय पञ्चायत सदस्य (रापस)को चुनाव लडेर विजयीसँगै सुरु भएको उनको संसदीय यात्रा आसन्न निर्वाचनसम्म कायम छ ।

कांग्रेसका निवर्तमान सभापति शेरबहादुर देउवा ०४८ यताका सबै निर्वाचनमा विजयी भएका थिए । यसपटक पनि उनले उम्मेदवार बन्ने इच्छा राखेका थिए । तर कांग्रेसको विशेष महाधिवेशनबाट सभापति बनेका गगन थापाले देउवाको चाहनामा ब्रेक लगाइदिएपछि उनी रोकिएका छन् ।

झापाबाट ०४८ पछि सातपटक चुनाव लड्दा ०६४ बाहेक ६ पटक निरन्तर जितेका एमाले अध्यक्ष केपी ओली आठौँपटक झापा ५ बाट उम्मेदवार छन् । एमालेले अगाडि सारेको प्रधानमन्त्रीका उम्मेदवारसमेत रहेका ओलीले आसन्न निर्वाचनमा काठमाडौं महानगरपालिका प्रमुख छाडेर झापा पुगेर सोही क्षेत्रबाट उम्मेदवारी दिएका रास्वपाका वरिष्ठ नेता बालेन्द्र शाह बालेनको चुनौती सामना गर्दै छन् । शाहलाई रास्वपाले पनि प्रधानमन्त्रीकै उम्मेदवारका रूपमा अगाडि सारेको छ ।

एमाले उपाध्यक्ष पृथ्वीसुब्बा गुरुङले पहिलोपटक ०४३ मा राष्ट्रिय पञ्चायतको चुनाव लडेयता निरन्तर लमजुङबाट उम्मेदवारी दिँदै आएका छन् । पहिलो चुनावमै पराजय व्यहोरेका उनी ०६४ र ०७९ मा प्रतिनिधिसभा र ०७४ मा प्रदेश सभामा विजयी भएका थिए । उनी गण्डकी प्रदेशको मुख्यमन्त्रीसमेत बनेका छन् । उनले अहिलेसम्म पाँचवटा चुनाव हारेका छन् । यसपटक भने गुरुङ जितको ह्याट्रिक गर्ने सोचमा छन् ।

कांग्रेसले यसपटक पनि सुनसरी ३ बाट विजय गच्छदारलाई प्रतिनिधिसभा निर्वाचनमा उम्मेदवारका रूपमा अघि सारेको छ । ०४८ देखि सुनसरी ३ मा निर्वाचन लड्दै आएका गच्छदार सोही क्षेत्रबाट आठौँपटक चुनाव लड्दै छन् । यसबिचमा उनले ०७९ बाहेक सबै चुनावमा जित निकालेर यसपटक दोस्रो ह्याट्रिक गर्ने योजनामा लागेका छन् । गच्छदार सुनसरी २ बाट समेत दुईपटक विजयी भएका थिए । कांग्रेसबाहेक उनले मधेशी जनअधिकार फोरम लोकतान्त्रिक, जसपाबाट पनि चुनाव जितेका छन् । गच्छदारजस्तै सातपटक चुनाव लडेर आठौँपटक उम्मेदवारी दिएका राप्रपाका नेता कमल थापाले मकवानपुर १ छाडेर यसपटक काठमाडौं ५ बाट उम्मेदवारी दिएका छन् । ०५१ मा बाहेक उनी अहिलेसम्म सधैँ पराजित हुँदै आएका छन् । तैपनि उनले उम्मेदवारी दिन भने छाडेका छैनन् ।

एमालेबाटै उपाध्यक्ष विष्णुप्रसाद पौडेल ०५१ यता ६ पटक चुनाव लडेका छन् । तीमध्ये पहिलो चुनावबाहेक पाँचपटक अपराजित यात्रा तय गरेका उनले छैटौँपटक जित निकाल्ने उद्देश्यसहित रुपन्देही २ बाट उम्मेदवारी दिएका छन् । एमालेबाटै चारपटक उम्मेदवार बन्नेमा उपाध्यक्ष गोकर्ण विष्ट, लेखराज भट्ट, नेता ईश्वर पोखरेल, प्रदीप ज्ञवालीलगायत पनि छन् । पोखरेल र भट्टले दुईपटक, विष्टले तीनपटक र ज्ञवालीले दुईपटक विजय हासिल गरिसकेका छन् । उनीहरू पाँचौँपटक प्रत्यक्षतर्फ उम्मेदवार छन् ।

नेकपाका संयोजक पुष्पकमल दाहाल प्रचण्ड पाँचौँपटक उम्मेदवार बनेका छन् । पाँचैपटक क्षेत्र फेरेर उठ्ने एक मात्र नेता प्रचण्डले सबैमा जित निकालेका छन् । यद्यपि, दुईवटा क्षेत्रबाट उठ्दा उनी पराजित पनि भएका थिए । ०५६ देखि लगातार सांसद नेकपाकै सहसंयोजक माधव नेपालले ०६४ बाहेकका सबै चुनाव जितेका छन् । जसअनुसार चारपटक प्रतिनिधिसभा र एकपटक राष्ट्रिय सभा सांसद बनिसकेका उनी छैटौँपटक सांसदमा रौतहट १ बाट प्रतिस्पर्धा गरिरहेका छन् ।

नेकपाकै नेता राजेन्द्र पाण्डेले धादिङबाट ०४८ यताका ६ वटा निर्वाचन लडेकोमा ०६४ को बाहेक पाँच निर्वाचन जितेका छन् । उनी सातौँपटक पुरानै क्षेत्रबाट नेकपाका उम्मेदवार बनेका छन् । कांग्रेस नेताहरू रमेश रिजाल र सुरेन्द्रप्रसाद चौधरी पनि ०४८ देखि लगातार चुनाव लड्दै आएका छन् । यसपटक पनि रिजाल पर्सा ४ र चौधरी क्षेत्र नम्बर ३ बाट उम्मेदवार बनेका छन् । ०४८ बाट लगातार टिकट पाएका सभापति शेरबहादुर देउवासहित धेरै नेताहरू भने यसपटक बाहिरिएका छन् । कांग्रेसबाटै सभापति गगन थापा, अनिल झा, अर्जुनप्रसाद जोशी, अभिषेकप्रताप साह, डा. चन्द्र भण्डारी, देवेन्द्रराज कँडेललगायतका नेताहरू चारपटकभन्दा बढी टिकट लिएर प्रतिनिधिसभाको उम्मेदवार बनेका छन् ।

नेकपाका नेताहरू सोमप्रसाद पाण्डे पनि ०५१ देखि पाँचपटक पाल्पाबाट उम्मेदवार बनेका छन् । तीनपटक निर्वाचित सांसद भइसकेका उनी छैटौँपटक पाल्पा २ बाट उम्मेदवार बनेका छन् । त्यस्तै, नेता वर्षमान पुन रोल्पाबाट लगातार ०६४ यता चारपटक उम्मेदवार बनेर पाँचौँपटक पुरानै क्षेत्रबाट उम्मेदवार बनेका छन् । देवेन्द्र पौडेल, बृजेशकुमार गुप्ता, गिरिराजमणि पोखरेल, महेन्द्र राय यादव, शक्तिबहादुर बस्नेत, अम्बरबहादुर थापालगायतका नेकपाका नेताहरू पनि चारपटकभन्दा बढी उम्मेदवार बनेर पाँचौँपटक मैदानमा उत्रिएका छन् ।

प्रगतिशील लोकतान्त्रिक पार्टीका डा. बाबुराम भट्टराई तीनपटक गोरखाबाट सांसद बनिसकेका छन् । अघिल्लोपटक उम्मेदवार नबनेका उनी अहिलेसहित चारपटक उम्मेदवार छन् । प्रलोपा नेता जनार्दन शर्मा पश्चिम रुकुमबाट पाँचौँपटक उम्मेदवार बनेका छन् । उनले सबै चुनाव जित्दै आएका छन् ।

जसपा नेपालका अध्यक्ष उपेन्द्र यादव लगातार ०६४ यता चारपटक सांसद बनेका छन् । अहिले पनि पुरानै क्षेत्र सप्तरी ३ बाट पाँचौँपटक उम्मेदवार बनेका छन् । राजकिशोर यादव चौथोपटक सिराहा ४ बाट उम्मेदवार बनेका छन् । त्यही पार्टीका हृदयेश त्रिपाठी पश्चिम नवलपरासीबाट ०४८ बाट छैटौँपटक उम्मेदवार बनेका छन् । सर्वेन्द्रनाथ शुक्ल पनि छैटौँपटक उम्मेदवार बनेर अहिले पनि रुपन्देही ४ बाट सिफारिस भएका छन् ।

साभार: नयाँपत्रिका