राष्ट्रिय सभा अध्यक्षसमक्ष खाँको ध्यानाकर्षण: कृष्णनगर नाका सुधारदेखि ‘हिट एन्ड रन’ कानुनसम्म
न्युज सेन्टर नेपाल- कपिलवस्तु.
कपिलवस्तुको कृष्णनगर नाकाको सुधार, सीमा व्यापार तथा पर्यटन प्रवर्द्धनसँगै सवारी दुर्घटना र ‘हिट एन्ड रन’ सम्बन्धी कानुनी व्यवस्थामा सुधार गर्न नेपाली कम्युनिष्ट पार्टी कपिलवस्तुका जिल्ला उप–सचिव इन्तेखाब अहमद खाँले राष्ट्रिय सभाका अध्यक्ष नारायण प्रसाद दहाल समक्ष दुई महत्वपूर्ण विषयमा ध्यानाकर्षण गराउनुभएको छ ।
खाँले कृष्णनगर नाकाबाट भारतीय पर्यटकका सवारीसाधन नेपाल प्रवेश गर्दा लाग्ने प्रतिदिन २ हजार ५ सय रुपैयाँ जरिवाना हटाउन, कृष्णनगरमा अध्यागमन कार्यालय स्थापना गर्न तथा पर्यटकमैत्री भन्सार सेवा सञ्चालन गर्न माग गर्नुभएको छ ।
त्यसैगरी, कृष्णनगरमा आधुनिक ‘ड्राइ पोर्ट’ (Dry Port) निर्माणको प्रक्रिया अगाडि बढाई यस क्षेत्रलाई पर्यटन तथा व्यापारको महत्वपूर्ण केन्द्रका रूपमा विकास गर्न आवश्यक पहल गरिदिन उहाँले आग्रह गर्नुभएको छ ।
खाँका अनुसार कृष्णनगर नाका कपिलवस्तुको मात्र नभई नेपालको पर्यटन, व्यापार, सीमा व्यवस्थापन र राजस्वसँग प्रत्यक्ष जोडिएको महत्वपूर्ण नाका भएकाले यहाँको पूर्वाधार र सेवा प्रणालीलाई समयअनुकूल सुधार गर्न आवश्यक छ ।
त्यस्तै, नेपालमा बढ्दै गएको सवारी दुर्घटना तथा ‘हिट एन्ड रन’का घटनालाई मध्यनजर गर्दै कानुनी तथा न्यायिक प्रक्रियालाई थप व्यवहारिक, छिटो र न्यायसंगत बनाउनुपर्ने विषयमा पनि उहाँले राष्ट्रिय सभा अध्यक्षको ध्यानाकर्षण गराउनुभएको छ ।
उहाँले दुर्घटनाका पीडितले छिटो न्याय पाउने र दोषीलाई कानुनअनुसार प्रभावकारी कारबाही हुने व्यवस्था सुनिश्चित गर्नुपर्ने बताउनुभएको छ । दुर्घटनाको प्रकृति, चालकको नियत र परिस्थितिअनुसार कानुनी प्रक्रिया स्पष्ट तथा व्यवहारिक बनाउनुपर्ने उहाँको माग छ ।
खाँले यी विषय कृष्णनगर र कपिलवस्तुको मात्र नभई नेपालको पर्यटन, व्यापार, सीमा व्यवस्थापन, राजस्व तथा नागरिक सुरक्षासँग जोडिएका राष्ट्रिय महत्वका विषय भएको बताउनुभएको छ ।
उहाँले कृष्णनगरको विकास र स्थानीय जनताको हितका लागि आफ्नो पहल निरन्तर जारी रहने प्रतिबद्धता समेत व्यक्त गर्नुभएको छ ।
पाठ्यसभाका अध्यक्ष नारायण प्रसाद दाहालले कपिलवस्तुको सिमानाका समस्या समाधानका लागि सम्बन्धित निकायसंग पहल गर्ने बताउनुभयो ।
सिमानाकामा नागरिकहरूलाई धेरै दुःख भएको विषयवस्तु उठिरहेको बेला यस्तो ध्यानाकर्षण पत्र आउनु सकारात्मक रहेको अध्यक्ष दहालले जानकारी दिनुभयो ।
अध्यक्ष दहालले कृष्णनगर लगायतका कपिलवस्तुका बारेमा आएका विषयवस्तुलाई सम्बन्धित निकायमा पठाउने आश्वासन दिनुभयो।
राष्ट्रिय सभा अध्यक्ष नारायणप्रसाद दाहाल समक्ष युवा नेता इन्तेखाब खाँले बुझाउनुभएको पत्र यस प्रकार रहेको छ। 
