प्रतिबन्धित भारतीय मुद्रासहित दुई थाई नागरिक पक्राउ

काठमाडौं – त्रिभुवन अन्तर्राष्ट्रिय विमानस्थलबाट प्रतिबन्धित भारतीय मुद्रासहित दुईजना थाई महिला पक्राउ परेका छन्। पक्राउ पर्नेमा थाई नागरिक ३२ वर्षीया वानवीसा जनसान र ४१ वर्षीया वारापोर्न खुनसोमवात रहेको त्रिभुवन अन्तराष्ट्रिय विमानस्थल सुरक्षा कार्यालयका प्रवक्ता एवं सूचना अधिकारी हिमालय कुमार श्रेष्ठले जानकारी दिनु भयो

प्रवक्ता एवं सूचना अधिकारी श्रेष्ठका अनुसार चेकजाँच गर्ने क्रममा उनीहरुको साथबाट २ लाख ९४ हजार ५०० प्रतिबन्धित भारतीय रुपैयाँ बरामद गरेको हो। काठमाडौंबाट भारतको दिल्ली जाने क्रममा चेकजाँच गर्दा ह्याण्ड ब्यागभित्र लुकाइछिपाइ राखेको अवस्थामा प्रतिबन्धित भारतीय रुपैयाँसहित दुवैजनालाई पक्राउ गरेको प्रहरीले जनाएको छ।

उनीहरुलाई आवश्यक अनुसन्धान तथा कारबाहीका लागि राजश्व अनुसन्धान विभाग हरिहरभवन पुल्चोक पठाएको प्रहरीले जनाएको छ।