बामपन्थी नेता मानन्धरको ९१ वर्षको निधन
काठमाडौं- बामपन्थी नेता बिष्णुबहादुर मानन्धरको ९१ वर्षको उमेरमा पाटन हस्पिटलमा सोमबार साँझ निधन भएको छ ।
स्वासप्रश्वासमा समस्या देखिएपछि १५ दिनअघि अस्पताल भर्ना गरिएका मानन्धरलाई आइतबारबाट भ्यान्टिलेटरमा राखेर उपचार थालिएको थियो । छोरा सुनिल मानन्धरका अनुसार, उपचारका क्रममा साँझ ८:२० बजे अस्पतालमा मानन्धरको निधन भएको हो ।
मङ्गलबार विहान ८ बजेदेखि ११ बजेसम्म पशुपति आर्यघाटमा स्वर्गीय मानन्धरको शव अन्तिम श्रद्धाञ्जलिका लागि राखिने छ ।
विक्रम सम्वत् १९८७ साल पुस ३ गते जन्मेका मानन्धर बारा, पर्सा, रौतहट क्षेत्रमा लोकप्रिय किसान नेताको रुपमा परिचित थिए ।
सादगी र इमान्दार कम्युनिस्ट नेताका रुपमा स्थापित मानन्धरले १२ वर्षअघि सक्रिय राजनीतिबाट अवकाश लिएका थिए ।
मानन्धरले राज्यका कुनै पनि सुविधा र सहुलियत नलिने घोषणा समेत गरेका थिए । उनले ज्येष्ठ नागरिक भत्तासमेत नलिएको परिवारले जनाएको छ ।
