सोसल मिडिया वार’को पक्षमा ओली, गलत लेखे कमेन्टबाटै सातो लिने चेतावनी
काठमाडौं- नेकपा एमालेका अध्यक्ष केपी शर्मा ओलीले ‘सोसल मिडिया वार’ मा सामेल हुन नेता कार्यकर्तालाई आग्रह गर्नु भएको छ । एमालेसम्वद्ध राष्ट्रिय युवा संघले बनाएको ‘साइबर सेना’को चर्को आलोचना भइरहेका बेला ओलीले भन्नु भयो ‘सोसल मिडिया वार’मा सहभागी हुनुपर्ने बताउनु भयो ।
आइतबार काठमाडौंमा आयोजित एक कार्यक्रममा ओलीले आफ्नो अभिव्यक्तिको गलत प्रयोग गरेको भन्दै टेलिभिजनको आलोचना गर्नु भयो । एक नेताले पदका लागि उपदो मच्चाएपछि आफूले अभिनयका साथ ‘मलाई त पदमै रस बस्यो, पद नभई भएन’ भन्छन् भनेर बोलेको, तर एउटा टेलिभिजनले मलाईं नभई हुँदैन’ भनेर देखाएर आफूलाई बद्नाम गर्न खोजेको उहाँले बताउनु भयो ।
आफ्नो नेतृत्वको सरकार भएका बेला पनि टेलिभिजन, रेडियो, सामाजिक सञ्जाललाई प्रयोग गरेर भ्रम फैलाउने काम गरेको उहाँले बताउनु भयो ।आफ्नो कला, साहित्य, प्रचार माध्यम र सामाजिक सञ्जालमार्फत यस्ता भ्रमहरु चिर्नुपर्नेमा एमाले अध्यक्ष ओलीले जोड दिनु भएको छ ।
आफूहरु नभएको भए २०१७ साल आइसक्थ्यो भन्दै उहाँले अघि भन्नुभयो , ‘आज त हामीसँग हरेकसँग मोबाइल छ । कसैले गलत कुरा लेख्यो भने त्यसको तल भरमार कमेन्टले धुलो झर्ने गरी, फेरिदेखि त्यस्तो टिप्पणीहरु नगर्ने गरी त्यसको सातो लिन सक्छौं ।’
कसैले राम्रो लेखेको छ भने सकारात्मक टिप्पणी गरेर उत्साहित गर्नुपर्ने उहाँले बताउनु भयो । एमाले अध्यक्ष ओलीले अघि भन्नु भयो हामी पनि यस वारमा यथाशक्य सामेल हुनुपर्छ । हामी ठूलो संख्यामा छौं । ठूलो संख्यामा भएकाले हामी सरिक भयो भने कसैमा भ्रम पर्न जरुरी छैन ।’
