माघ ४ देखि राष्ट्रिय सभाको अधिवेशन
प्रतिनिधिसभा विघटन भई २१ फागुनका लागि निर्वाचन तयारी भइरहेको वेला संघीय संसद्को माथिल्लो सदन राष्ट्रिय सभाको अधिवेशन आह्वान भएको छ । मन्त्रिपरिषद्को बैठकले सिफारिस गरेअनुसार राष्ट्रपति रामचन्द्र पौडेलले अधिवेशन आह्वान गरेका छन् । पौडेलले आगामी ४ माघको बिहान ११ बजे पहिलो बैठक बस्ने गरी आह्वान गरेका हुन् ।
जेन–जी आन्दोलनको क्रममा नयाँ बानेश्वरस्थित संसद् भवनमा आगजनी भएकाले सिंहदरबारमा बैठक बस्ने गरी बोलाइएको हो । जेन–जी आन्दोलनपछि पहिलोपटक राष्ट्रिय सभा बैठक बस्न लागेको हो । जेन–जी आन्दोलनपछि सुशीला कार्की नेतृत्वको सरकारको सिफारिसमा राष्ट्रपति पौडेलले प्रतिनिधिसभा विघटन गरी आगामी २१ फागुनका लागि निर्वाचन तोकेका छन् । सरकारको सिफारिसमा राष्ट्रपतिले गत ३१ भदौमा राष्ट्रिय सभाको अधिवेशन अन्त्य गरेका थिए ।
अधिवेशनमा के हुन्छ ?
संघीय संसद्ले कानुन बनाउने भएकाले एउटा सभाले मात्रै कानुन बनाउन सक्दैन । तर, जनप्रतिनिधिको भूमिका राष्ट्रिय सभाले खेल्न सक्छ । सरकारको कामको निगरानी र खबरदारी गर्न सक्छ । विभिन्न प्रस्ताव आउन सक्छन् । सांसदहरूले विषयगत र क्षेत्रगत विषय उठाउन सक्छन् । ‘संघीय संसद्ले कानुन बनाउने हो । तर, एउटा सभाले मात्रै कानुन बन्दैन । राष्ट्रिय सभाले विचाराधीन विधेयक र अध्यादेश अगाडि बढाउन सक्छ । सरकारलाई निगरानी गर्न भूमिका हुन्छ, जनप्रतिनिधित्वको भूमिका खेल्छ र विभिन्न्न प्रस्ताव आउन सक्छन्,’ संसद् सचिवालयका प्रवक्ता एकराम गिरीले भने ।
अधिवेशनमा विचाराधीन विधेयक र अध्यादेशमाथि पनि छलफल हुनेछ । राष्ट्रिय सभामा पाँच विधेयक विचाराधीन छन् । सभामा विचाराधीन अभौतिक सांस्कृतिक सम्पदा (संरक्षण) विधेयक, राष्ट्रिय विधि विज्ञान प्रयोगशाला (स्थापना र सञ्चालन) विधेयक छन् भने तीनवटा विधेयक विधायन समितिमा विचाराधीन छन् । जसमा पर्यटन विधेयक, चलचित्र विधेयक र सामाजिक सञ्जाल विधेयक छन् । यस्तै, प्रतिनिधिसभा सदस्य निर्वाचन (पहिलो संशोधन) अध्यादेश र नेपाल विशेष सेवा (दोस्रो संशोधन) अध्यादेश छन् ।
साभार : नयाँपत्रिका
