प्रदेश २ को बजेट सर्वसहमतिबाट पारित, त्रुटि सच्याउने आश्वासन
जनकपुरधाम- प्रदेश २ को बजेट सर्वसम्मतिबाट पारित भएको छ। प्रक्रिया छोट्याएर मंगलबार प्रदेशसभाबाट बजेट सर्वसहमतिले पारित भएको हो।आर्थिक वर्ष २०७७–०७८ का लागि असार १ गते प्रदेश सरकारले ३३ अर्ब ७९ करोड १४ लाख ३० हजारको बजेट सार्वजनिक गरेको थियो। बजेटको चालुतर्फ १५ अर्ब ६३ करोड ३३ लाख ४७ हजार (४६.२६ प्रतिशत), पुँजीगततर्फ १८ अर्ब ५ करोड ८० लाख ८३ हजार (५३.४४ प्रतिशत) र वित्तीय व्यवस्थापनतर्फ १० करोड (०.३० प्रतिशत) छुट्याइएको छ।
असारभित्रै बजेट पारित गर्नुपर्ने बाध्यताका कारण सरकारले प्रक्रिया छोट्याएर बजेट पारित गरिएको हो।मन्त्रालयको बजेट र अबण्डा रकमबारे विपक्षी दलले विरोध गरेपछि मुख्यमन्त्री लालबाबु राउतले दुई दिन सहमतिका लागि प्रयास गरेका थिए। तर आज मन्त्रालयगत छलफल नगरेरै र मन्त्रीहरूलाई जवाफको समय समेत नदिएर बजेट पारित गरिएको हो।
प्रदेश सभालाई सम्बोधन गर्दै मुख्यमन्त्री राउतले समय अभाव राजनीतिक अवस्थाले बजेटमा त्रुटि र कमीकमजोरी भएको स्विकार गर्दै बजेटमा भएको त्रुटि मन्त्रिपरिषदको रेडबुक सच्याउने प्रतिबद्धता जनाएपछि बजेट पारित भएको हो।
मुख्यमन्त्री लालबाबु राउतले बजेट पुस्तिकामा रहेको अबन्डा सत्ता पक्ष र विपक्षका सांसदलाई समावेशी रूपमा पारदर्शी तवरले उपलब्ध गराउने राउतले बताए।अर्थमन्त्री विजय यादवले पनि बजेटको त्रुटि सच्याउने आश्वासन दिएका थिए।
