कपिलवस्तुमा गोरु तस्कर विरुद्ध मुद्धा दायर
छाडा गाईगोरुलाई अवैध तरिकाले संकलन गरेर क्रुर तथा अमानवीय व्यवहार एवम् चरम यातना दिएर झापासम्म पुर्याएको भन्दै उक्त मुद्दा चलाइएको हो ।
बाराको निजगढ नगरपालिका ४, का कमल धामीलाई प्रहरीले पशुपंक्षीप्रति निर्दयी व्यवहार गरेको जनाउँदै मुद्दा दर्ता गरेको छ ।
प्रहरी प्रवक्ता डिएसपी मोहनमणि अधिकारीका अनुसार ईलाका प्रहरी कार्यालय गणेशपुरले हिजो बिहान ४ बजे ना.६ ख ३७०८ नम्बरको ट्रकमा यातनापूर्ण अवस्थामा राखिएका २१ वटा गोरुसहित धामीलाई नियन्त्रणमा लिएको थियो ।
‘पशुको नाक र पुच्छर दुबैतर्फ डोरीले बाँधेको र नाकबाट रगत बगिरहेको देखिएपछि उनलाई मुलुकी अपराध संहिता २०७४ को परिच्छेद २७ दफा २९० अन्तर्गत मुद्दा चलाइएको हो,’ प्रहरीको भनाई छ । धामीलाई प्रशासन कार्यालयबाट सात दिनको म्याद थपेर प्रहरी हिरासतमा राखिएको छ ।
प्रहरी उपरीक्षक निरञ्जन दत्त भट्टका अनुसार पशुपंक्षी यातना तथा अमानवीय व्यवहारविरुद्धको कपिलवस्तुमा यो पहिलो मुद्दा हो ।
‘हामीले पशुपंक्षीलाई यातना दिने, अवैध ओसारपसार गर्ने, निर्दयी व्यवहार गर्नेलाई कानूनी प्रक्रियामा ल्याउन विशेष अभियान नै सञ्चालन गरेका छौं,’ एसपी भट्टले भने ।
गोरु तस्कर पक्राउ परेपनि राजस्व र भन्सारले बुझ्न नमान्ने, भाडाको गाडी छाड्नुपर्ने, गोरुधनी सकार्न नआउनेलगायत समस्याले गोरु तस्करी नियन्त्रणमा आउन नसकेको हो ।
प्रहरीले अवस्था हेरेर मुद्दा प्रक्रियामा लैजान थालेको छ । पक्राउ परेका धामीलाई दोषी पाइए पशुपंक्षीलाई निर्दयी व्यवहारअन्तर्गत तीन महिनासम्म कैद वा पाँच हजार जरिवाना वा दुबै हुने सजाय हुनसक्छ ।
विगत तीन महिना यता कपिलवस्तुमा गोरुको अवैध कारोबार हुँदै आएको छ ।
