मनकामना वनको अध्यक्षमा विनोद निर्वाचित
न्युजसेन्टर नेपाल– कपिलवस्तुको शिवराज नगरपालिका–१ मा रहेको मनकामना सामुदायिक वन उपभोक्ता समूहको नयाँ नेतृत्व चयन भएको छ । समूहको अध्यक्ष पदमा विनोद कुवर निर्वाचित हुनुभएको हो ।
कुवरको अध्यक्षतामा ११ सदस्यीय उपभोक्ता समिति चयन गरिएको छ । उपाध्यक्षमा सोनिया थारु, सचिवमा पूर्णमाली विक, सहसचिवमा भूपेन्द्र बहादुर बिष्ट क्षेत्री र कोषाध्यक्षमा सरोज शर्मा निर्वाचित भएका छन् ।
यस्तै, सदस्यहरूमा पुरन बहादुर खत्री क्षेत्री, समिम अहमद मुसलमान, मिना थापा, गोमा देवी भारती, मोहम्मद वानी र शान्ता रावत क्षेत्री रहेका छन् ।
समूहमा जम्मा १५०४ उपभोक्ता रहेकामा ५८७ जनाले मात्र मतदानमा सहभागिता जनाएका थिए । अध्यक्ष पदका लागि भएको प्रतिस्पर्धामा विनोद कुवरले ३०३ मत प्राप्त गर्दै विजयी हुँदा उनका निकटतम प्रतिद्वन्द्वी डिलप्रसाद गैरेले २४३ मत प्राप्त गरेका थिए ।
निर्वाचनपश्चात उपभोक्ताहरूले नयाँ नेतृत्वप्रति विश्वास व्यक्त गरेका छन् । उनीहरूले विगतका कमजोरी सुधार गर्दै वन संरक्षण र सम्वर्द्धनमार्फत समृद्धिको बाटोमा समिति अघि बढ्ने अपेक्षा गरेका छन् ।
नवनिर्वाचित अध्यक्ष विनोद कुवरले आफूले पाएको जिम्मेवारीलाई इमान्दारीपूर्वक निर्वाह गर्ने प्रतिबद्धता जनाउनुभयो ।
उहाँले भन्नुभयो, “वन उपभोक्ताको हितका लागि पारदर्शिता, सहभागिता र उत्तरदायित्वका साथ काम गर्नेछु । विगतका अनुभवलाई मूल्यांकन गर्दै सुधारका प्रयास अघि बढाउँछु । वन संरक्षण मात्र होइन, उपभोक्ताको जीवनस्तर उकास्न आम्दानीमुखी कार्यक्रम ल्याइनेछ ।”
