एसइईको रिजल्ट वैशाख अन्तिम साता

काठमाडौं। राष्ट्रिय परीक्षा बोर्डले माध्यमिक शिक्षा परीक्षा (एसइई) को रिजल्ट वैशाख अन्तिम साता प्रकाशन गर्ने भएको छ ।

विगतमा परीक्षा सकिएको तीन महिनामा रिजल्ट आउने गरेकोमा बोर्डले यस पटक भने एक महिनाभित्रमै नतिजा सार्वजनिक गर्न लागेको हो ।

तेस्रो साताको अन्तिमतिरै नतिजा प्रकाशन गर्ने तयारी भइरहेको बोर्डले जनाएको छ ।
अहिले प्राप्त अंकलाई रुजु गर्ने काम भइरहेको छ । रुजु गर्दा पनि कुनै प्राविधिक समस्या देखिएन भने यो महिनाको अन्तिममा रिजल्ट प्रकाशन गर्ने तयारी छ ।

नयाँ सरकार गठन भएपछि सुरु भएको एसइईको नतिजा सुरुमा त १५ दिनभित्रमै सार्वजनिक गर्ने विषयमा पनि छलफल भएको थियो तर निकै नै हतार गर्दा समस्या आउन सक्ने देखिएकाले बढीमा एक महिनाभित्रमा सार्वजनिक गर्ने विषयमा मन्त्रालय र बोर्डका अधिकारीबिच छलफल भएको थियो ।

नतिजा प्रकाशनलाई छरितो बनाउन यस पटक एसइईको उत्तरपुस्तिका परीक्षा केन्द्रमै परीक्षण गरिएको थियो भने उत्तरपुस्तिका परीक्षण गर्न जनशक्ति पनि धेरै खटाइएको थियो ।

एसइई चैत १८ गतेदेखि २९ गतेसम्म सञ्चालन भएको थियो । परीक्षामा मुलुकभरबाट पाँच लाख १२ हजार ४२१ जना सहभागी भएका थिए । जसमध्ये दुई लाख ५७ हजार ६१३ जना छात्रा र दुई लाख ५४ हजार ८०१ जना छात्र छन् ।

एसइई गत चैत २९ गते सकिएको थियो ।